Բրեդ Փիթը 100 հազար դոլար կտրամադրի միասեռ ամուսնությունների համար

Հոլիվուդյան դերասան Բրեդ Փիթը խոստացել է 100 հազար ամերիկյան դոլար տրամադրել միասեռ ամուսնությունների համար. տեղեկացնում է Մարդու իրավունքների պաշտպանության (Human Rights Campaign`HRC) ամերիկյան գրասենյակը: Գումարը կփոխանցվի HRC-ին, քանի որ վերջինս համասեռամոլների շահերը ներկայացնող ամենախոշոր կազմակերպություններից մեկն է ԱՄՆ-ում։ 

Փիթն ասել է, որ HRC-ի կայքում իր ելույթի հրապարակումից հետո 24 ժամվա ընթացքում պատրաստ է կրկնապատկել միասեռ ամուսնությունների համար նվիրաբերած գումարը՝ արդյունքում նվիրաբերելիք գումարը հասցնելով 100 հազար դոլարի։

Այս ակցիան կապված է Մեն, Մերիլենդ, Մինեսոտա և Վաշինգտոն նահանգներում ընտրությունների հետ, որոնք կայանալու են նոյեմբերի 6-ին, և որոնց ընթացքում բնակիչները պետք է նաև որոշեն՝ օրինականացնել միասեռ ամուսնությունները, թե՝ ոչ։ 

Ինչպես հայտնում է կազմակերպության պաշտոնական կայքը, վերջին 2 տարվա ընթացքում ԱՄՆ-ում միասեռ ամուսնությունների լոբբինգի  համար ծախսվել է ութ միլիոն դոլար։ Իսկ Բրեդ Փիթի կողմից առաջարկված ֆինանսական աջակցությունն համընկել է մինչընտրական նախագահական քարոզարշավին։

Դերասանը նախկինում էլ էր հանդես եկել նման նախաձեռնությամբ։ Ավելի վաղ նա անգամ հայտարարել էր, որ չի ամուսնանա այնքան ժամանակ, քանի դեռ ԱՄՆ-ի բոլոր նահանգներում չեն օրինականացվել միասեռ ամուսնությունները։