Արտակ Շաբոյան. Հայաստանում մրցակցությունը թույլ չէ

Տնտեսական մրցակցության պաշտպանության պետական հանձնաժողովի նախագահ Արտակ Շաբոյանն այսօր լրագրողների հետ ճեպազրույցում ասաց, որ Հայաստանում մրցակցությունը թույլ չէ. «Ճիշտ է, բազմաթիվ չլուծված խնդիրներ կան, բայց այդ ուղղությամբ ահագին աշխատանքներ տարվել են, տարվում են և էլի տարվելու են»:

Լրագրողների այն դիտարկմանը՝ եթե մրցակցությունը թույլ չէ՝ քանի՞ շաքարավազ ներկրող կա, Շաբոյանն ասաց. «Պատրաստ եմ հրավիրել բոլոր այն լրագրողներին, ովքեր հետաքրքրված են այդ հարցով, և ևս մեկ անգամ պարզաբանումներ տալ: Շուկաների կենտրոնացվածություն, գերիշխող դիրքերի առկայություն մեր օրենսդրությունը չի արգելում, ընդ որում՝ ոչ միայն մեր՝ հայաստանյան օրեսնդրությունը, այլ նաև ամբողջ աշխարհում այն չի արգելում շուկաների կենտրոնացվածություն։ Մենք պայքարում ենք գերիշխող դիրքի չարաշահումների դեմ, այլ ոչ թե կենտրոնացվածության»,-ասաց Շաբոյանը:

Վերջինիս խոսքերով՝ կենտրոնացվածության բարձր աստիճանն ունի իր օբյեկտիվ հիմքերը, որոնք են՝ երկրի փոքր մասշտաբներ, փոքր շուկան, սահմանափակվածություն, ճանապարհների խնդիր:

«Մեր այս տարվա ուսումնասիրությունը ցույց է տվել, որ մեր ուսումնասիրած 18-19 շուկաների մեծ մասը միջին կենտրոնացվածության են, կան նաև ցածր կենտրոնացվածության շուկաներ: Կենտրոնացվածության աստիճանի նվազում կա, օրինակ՝ երշիկի, հյութերի, մակարոնեղենի շուկաները»,-ասաց Արտակ Շաբոյանը: