Արմեն Պողոսյան. Նախագահական ընտրություններից հետո գազի գինը կբարձանա

«Գազի գնի թանկացումն անխուսափելի է: Մեր հասարակության նպատակը պետք է լինի ոչ թե դիմադրելը թանկացումներին, այլ պետք է մտածենք, թե ինչ ռեսուրսներ ունենք կոմպենսացնելու այդ խնդիրը: Գազի գնի թանկացումը կբերի հացամթերքի, էլեկտրաէներգիայի, ցեմենտի թանկացմանը»,-այսօր լրագրողների հետ հանդիպմանն հայտարարեց «Հայաստանի սպառողների ասոցիացիա» ՀԿ նախագահ Արմեն Պողոսյանը

«Գազի գինը որոշվում է Կրեմլում, մենք այդ հարցում անելիք չունենք: Հայաստանը ստանում է էքսկլյուզիվ գնով գազ: Եվրոպային տալիս են 330,  Հայաստանին հատուկ 180 դոլարով»,– ասաց նա:

«Քաղաքակիրթ երկրներում գոյություն ունի չափանիշ, երբ գնաճի տոկոսի թիվը մոտենում է 25-ի, ապա գործի է դրվում աղքատության դեմ պայքարը: Եթե տվյալ սննդի վրա ծախսվում է 80 տոկոս, մարդը կարող է մտածել միայն ուտելու մասին, իսկ մարդը ծնվել է հոգևոր սնունդ ստանալու համար, բայց այդ պարագայում նա նման հնարավորություն չունի»,- ասաց Արմեն Պողոսյանը:

Իսկ ահա կառավարման փորձագետ Հարություն Մեսրոպյանի կարծիքով, գազը մեր երկրում վաճառվում է կրկնակի թանկ։

«Գազը ստանում ենք 180 դոլարով, բայց վաճառում ենք 360-ով: Սա ի՞նչ բիզնես է, երբ ապրանքը գնելուց հետո սեփական բնակիչներին վաճառվում է կրկնակի գնով: Պարբերաբար ասում են, որ «ՀայՌուսգազարդը» լավագույն ընկերությունն է, բայց ով էլ կրկնակի բիզնես անի, լավագույնը կլինի: Երկրորդ՝ մեր պետությունը փայաբաժին ունի «ՀայՌուսգազարդում»: Մենք երբեք չենք իմացել' մեր պետությունը այդ փայաբաժնում ինչ դեր է խաղում՝ դեպի գնի բարձրացու՞մ, թե՝ իջեցում»,- ասաց Հարություն Մեսրոպյանը:

Ըստ բանախոսների՝ ընտրություններից հետո մեր երկրում գազի գինը կթանկանա՝ հասնելով 200-250 դրամի:

«Մեր երկրում գործում է աղքատության հաղթահարման ծրագիր, որի ղեկավարը վարչապետն է, և օրենքի ուժ ունի: Այնտեղ գրված է, որ գները և սակագները չպետք աճեն չորս տոկոսից ավել: Սակայն մենք տեսնում ենք, որ մետրոն թանկացավ 100 տոկոսով, շաքարավազը թանկանում է, ջուրը թանկանում է»,– ասաց Արմեն Պողոսյանը:

Ըստ բանախոսների, գազի գինը կարող է և չաճել, բայց քանի որ մենք բիզնես ենք անում, ապա այն անպայման կթանկանա: Հարություն Մեսրոպյանը այս իրավիճակից դուրս գալու համար ելք չի առաջարկում՝ պատճառաբանելով, որ՝ «Սա օլիգարխացված պետություն է: Այն վերաբերում է և՛ տնտեսությանը, և՛ քաղաքականությանը: Ես առաջարկներ չունեմ այդ իրավիճակի բարելավման համար: Եթե տնտեսությունը փորձենք զարգացնել մեկ ուղղությամբ, մենք կունենաք չարորակ ուռուցքի տեսքով տնտեսություն»,– պատկերավոր ներկայացրեց նա:

Ըստ Արմեն Պողոսյանի, երբ ՀՀ նախագահը 2008թ.-ին հրաման արձակեց հայթայթել միջոցներ, որ մեր երկրի մասնաբաժինն ավելանա «ՀայՌուսգազարդում», այդ հրամանագիրը մնաց անկատար։

«Այդ ժամանակ մեր երկիրը ուներ 45%, իսկ դրանից հետո այն նվազեց' դառնալով 20%: Նման պարագայում մենք ոչինչ չենք կարող անել: Մեր բյուջեն պետք է համալրվի նոր միջոցներով: Մեր երկրի բյուջեն համալրող ամենաիրական ոլորտները շինարարությունն է և արդյունաբերությունը: Շինարարության առումով մենք ոչինչ չունենք, մենք տեսնում ենք միայն դատարկ շենքեր: Հանքարդյունաբերության մեջ մենք ինչ-որ դուրս են հանում, ստացված գումարը մտնում է բաժնետերերի գրպանը»,- ասաց Արմեն Պողոսյանը: