Անընդհատ տեղի է ունենում ցորենի գնի բարձրացում. Արտակ Շաբոյան (տեսանյութ)

Հանձնաժողովը հետևում է հացի շուկայում տեղի ունեցող բոլոր զարգացումներին։ Այս մասին այսօր լրագրողների հետ ճեպազրույցում ասաց Տնտեսական մրցակցության պաշտպանության պետական հանձնաժողովի նախագահ Արտակ Շաբոյանը։

Վերջինիս խոսքերով՝ հացի շուկան բարձր կենտրոնացվածության և սոցիալական կարևոր նշանակություն ունեցող շուկա է. «Մենք ամեն օր մոնիթորինգ ենք իրականացնում և՛ տեղական, և՛ ներմուծող շուկայում։ Ցորենի ներմուծման գնային փոփոխությունները համահունչ են միջազգային շուկայի զարգացումներին և միջազգային շուկայում անընդհատ տեղի են ունենում ցորենի գների բարձրացումներ, Ռուսաստանը սահմանափակումներ է իրականացնում և հիմնականում դա պայմանավորված է ցորենի բերքի հետ։ Ոչ բարենպաստ կլիմայական պայմանների հետ կապված՝ բերքի ծավալները քիչ են եղել այս տարի և օբյեկտիվորեն դրանք ազդել են ցորենի գնի վրա»,-ասաց Շաբոյանը։

ՏՄՊՊՀ նախագահի խոսքերով՝ ուսումնասիրություններն այս պահին ընթացքի մեջ են, անընդհատ գնային փոփոխություններ են տեղի ունեում միջազգային շուկայում և իրենք հետևում են շուկայի գնային զարգացումներին։