Սեռական կյանքը քարոզարշավ է հիշեցնում

Այսօր լրագրողների հետ հանդիպմանը սեքսապաթոլոգ Վրեժ Շահրամանյանը, խոսելով «Սեքսն ու քաղաքականությունը» թեմայի շուրջ, նշեց. «Հաճախ մարդիկ մոռանում են իրենց անձնական կյանքը և յուրաքանչյուր խնդիր փորձում են հաղթահարել գործնական կյանքում: Այս դեպքում սեռական կյանքը քարոզարշավ է հիշեցնում, որը սկզբնական շրջանում լինում է ակտիվ, այնուհետև աստիճանաբար նվազում է: Հանդիպում է  նաև հակառակ երևույթը՝ սեքսուալ էներգիան վերափոխելով ենթարկվում է սուբլիմացիայի, և հասարակական կյանքում գերակտիվ աշխատելաոճ դրսևորող մարդիկ փորձում են այդկերպ լրացնել սեռական կյանքի բաց կողմը»: 

Ինչպես իր խոսքում նշեց սեքսապաթոլոգը, քաղաքականությամբ զբաղվող կանայք կարող են սեռական կյանքի բացը լրացնել տարբեր տիպի հետաքրքիր աշխատանքներով:

Ինչ վերաբերում է սեռական կյանքի պասիվացմանը նպաստող գործոններին, Շահրամանյանն առանձնացրեց մասնավորապես երկու դեպք՝ արտագաղթն ու սոցիալական գործոնը: «Առաջին գործոնի դեպքում երկրից տղամարդիկ գնում են արտագնա աշխատանքի, տանը մնում են միայնակ կանայք, չեն ծնվում երեխաներ, իսկ սոցիալական վիճակն էլ իր հերթին է քիչ երեխաներ ունենալուն է նպաստում»,-ասաց վերջինս 

Ասուլիսի մյուս բանախոս գինեկոլոգ Գեորգի Պողոսյանն էլ նշեց, որ արտագաղթը սահմանափակում է դնում երեխաների քանակի վրա, մեծ վտանգ է առաջանում սեռավարակների հետ կապված և այդ խնդիրը ոչ միայն բժշկական, այլև սոցիալական կողմ ունի։ «Վեներական հիվանդությունների թիվը չի տարբերվում 50-ական թվականներից։ Ավելացել են ինֆեկցիոն հիվանդությունները, ինչն ավելի վտանգավոր ու անհաղթահարելի է դառնում»,- հավելեց նա։