Գերմանիան փորձելու է արագացնել Թուրքիայի՝ ԵՄ-ին անդամակցելու հարցը

Ս.թ. հոկտեմբերի 30-ին պաշտոնական այցով Բեռլին կատարած այցի ընթացքում Թուրքիայի վարչապետ Ռ.Թ. Էրդողանը Գերմանիայի կանցլեր Ա.Մերկելի հետ իր հանդիպմանը քննարկել է ԹՀ-ի ԵՄ-ին անդամակցելու հարցը: Գերմանիայի ԱԳ նախարար Գ.Վեստերվելլեն լրագրողների հետ հանդիպման ընթացքում ընդգծել է, որ գերմանական կողմը կոչ է արել ԹՀ-ին նոր թափ հաղորդել ԵՄ երկրների հետ իր միջպետական հարաբերություններում, որն առավել կխթանի վերջինիս մուտքը ԵՄ կառույց: Վերջինս նշել է, որ ԹՀ-ն Մերձավոր Արևելքի երկրներում ընթացող Արաբական գարնան գործընթացներում բավականին հետևողական դիրքորոշում է արտահայտել, որն առավել մոտ է ԵՄ երկրների որդեգրած քաղաքական դիրքորոշմանը:

Ինչպես հաղորդել է գերմանական Deutche Welle գործակալությունը, Գերմանիայի ԱԳ նախարարն իր խոսքում բարձր գնահատական է տվել ԹՀ-ի վերջին 10 տարիների ընթացքում քաղաքական, տնտեսական ուղեգծին, որն առաջին հերթին նպաստել է ԹՀ-ի՝ որպես տարածաշրջանային հզոր պետություն դառնալու հավանականությանը: Վերջինիս խոսքերով՝ ԹՀ-ի իշխող կուսակցությանը հաջողվում է երկրի քաղաքական բարեփոխումների արդյունքում հասնել այն խնդրին, որ իսլամն ու ժողովրդավարեցումը կարող են համատեղվել մեկ ռազմավարության մեջ: Ընդգծվել է, որ ԹՀ-ն հանդիսանում է Գերմանիայի խոշոր առևտրային գործընկերներից մեկը, և Գերմանիայում ապրող ավելի քան 3 մլն ազգությամբ թուրք քաղաքացիները ԹՀ-Գերմանիա նման որակի միջպետական հարաբերություններում պարզապես շահեկան դիրքերում են գտնվում: ԱԳ նախարարն ընդգծել է, որ իր երկիրը դեմ է ազգային փոքրամասնությունների իրավունքների ոտնահարմանը, այլատյացությանն ու քսենաֆոբիային:

Հատկանշական է, որ գերմանական Die Welt գործակալության հաղորդման համաձայն՝ Ռ.Թ.Էրդողանի Բեռլին կատարած այցն ուղեկցվել է նաև մի շարք բողոքի ակցիաներով: Այն կազմակերպվել է Գերմանիայում բնակվող ազգային փոքրամասնությունների՝ քրդերի, ալևիների, հայերի մասնակցությամբ, որին միացել են նաև երկրում գործող ձախ արմատական խմբավորումները: Ակցիայի մասնակիցները, որոնց թիվը կազմել է ավելի քան 3 հազար անձ, բողոքի ցուցապաստառներով դեմ են արտահայտվել ԹՀ վարչապետի այցի դեմ՝ մեղադրելով վերջինիս իշխող կուսակցությանը Սիրիայում տիրող իրավիճակի ապակայունացման հարցում, և որ վերջինիս քաղաքականության արդյուքնում տարածաշրջանում հրահրվում է ազգային լուրջ խտրականություն:

Ուշագրավ է, որ ԹՀ վարչապետի՝ Բեռլին կատարելիք այցի ընթացքում վերջինս առաջարկել է Գերմանիայի կանցլեր Ա.Մերկելին որոշում ընդունել Գերմանիայում ապրող թուրք քաղաքացիներին իրավունք ունենալ կրելու երկքաղաքացիություն, որը սակայն իրավաբանորեն արգելվում է Գերմանիայում: