Մեքսիկայի խորհրդարանում նախաձեռնել են հուշարձանների վերաբերյալ օրենսդրության փոփոխություն

Մեքսիկայի Պատգամավորների պալատում «Ազգային գործողություն կուսակցությունը» (PAN) հադնես է եկել հուշարձանների տեղադրումը համակարգելու վերաբերյալ նախաձեռնությամբ՝ Ադրբեջանի նախկին նախագահի հուշարձանի տեղադրման շուրջ ծագած հակամարտության նման կոնֆլիկտներից խուսափելու համար:

Պատգամավոր Ադրիանա Գոնսալեսը հանդես եկավ «Հուշարձանների, հնագիտական, մշակութային, պատմական վայրերի Դաշնային օրենքի» բարեփոխման նախաձեռնությամբ, որում առաջարկվում է ստեղծել տեխնիկական խորհուրդ՝ կազմված գիտնականներից, պատմաբաններից և մարդու իրավունքների գիտակներից:

Վերջիններս կվերանայեն Դաշնային կառավարության, Դաշնային շրջանի, քաղաքապետարանների, նահանգների կողմից ստորագրվող հուշարձանների տեղադրման վերաբերյալ համաձայնագրերը:

Պատգամավոր Ադրիանա Գոնսալեսը նշում է. «Նախաձեռնության նպատակն է կանխել նման դեպքերի կրկնությունը, որպեսզի որևէ քաղաքային իշխանության, որևէ դաշնային կառույցի կողմից վտանգի տակ չդրվի երկրի հեղինակությունը, ազգային արժեքները՝ հուշարձաններ տեղադրելով և գովերգելով այնպիսի գործիչների, որոնք չեն համապատասխանում 21-րդ դարի մեր արժեքներին: Սա է մեր առաջին դիրքորոշումը, ցանկանում ենք, որպեսզի հուշարձանը հանվի և այդ միջգերատեսչական պայմանագիրը կասեցվի»:

Աղբյուրը՝ Azteca Noticias