Հունգարահայ համայնքը պատրաստվում է Սաֆարովի հարցը վիճարկել դատարանում

Նոյեմբերի 1-ին ՀՀ սփյուռքի նախարար Հրանուշ Հակոբյանն ընդունեց Հունգարիայի հայ համայնքի նախագահ Սևան Սարգսյանին, փոխնախագահ Ալեքս Ավանեսյանին և ԱՕՔՍ-ի «Հայաստան-Հունգարիա» բարեկամության ընկերության նախագահ Անահիտ Սիմոնյանին:

ՀՀ սփյուռքի նախարար Հրանուշ Հակոբյանը ողջունեց հունգարահայ համայնքի՝ հատկապես հունգարական իշխանությունների կողմից ադրբեջանցի մարդասպանին արտահանձնելու որոշումից հետո ծավալած ակտիվ գործունեությունը:

Հունգարիայի հայ համայնքի ղեկավարներն առաջիկայում պատրաստվում են դիմել դատարան՝ վիճարկելու Հունգարիայի իշխանությունների որոշումը և ապացուցելու, որ ադրբեջանցի մարդասպանի արտահանձնման գործընթացը հակասում է, նախևառաջ, Հունգարիայի օրենսդրությանը: Հունգարիայի հայ համայնքի ղեկավարը տեղեկացրեց, որ հունգարական իշխանություններն արտահանձնումից հետո այլևս չեն ցանկանում անդրադառնալ և քննարկել ադրբեջանցի մարդասպանի հարցը, ուստի հայ համայնքը դժվարություններ է ունենում այս խնդրով բանակցություններ վարելիս: Փոխարենը նրանք համագործակցում են հունգար առաջադեմ մտավորականների ու հասարակական գործիչների, ընդդիմադիր մամուլի հետ: Հանդիպման ընթացքում կարևորվեց աշխարհասփյուռ հայության միասնական դիրքորոշում ունենալու հանգամանքը և տարբեր երկրների համայնքների հետ համագործակցելու անհրաժեշտությունը:

Հանդիպման մասնակիցները մտքեր փոխանակեցին համայնքային կյանքի կազմակերպման, գործունեության առաջնահերթությունների վերաբերյալ: Նախարար Հ. Հակոբյանը ներկաների ուշադրությունը հրավիրեց Հունգարիայում հայագիտական կենտրոնի ստեղծման, հայկական մշակույթի պահպանման և հայոց լեզվի պահպանությանն ուղղված քայլերին՝ այս գործում կարևորելով համայնքի մասնակցությունը սփյուռքի նախարարության տարբեր ծրագրերին, տեսակոնֆերանսներին: Քննարկվեցին Հայոց Ցեղասպանության 100-րդ տարելիցին ընդառաջ իրականացվելիք ծրագրերը, նախանշվեցին անելիքները: