Դավիթ Սանասարյանն ընդդեմ Ռուբեն Հայրապետյանի (տեսանյութ)

Այսօր Ավան և Նոր Նորք համայնքների ընդհանուր իրավասության դատարանում տեղի ունեցավ Դավիթ Սանասարյանն ընդդեմ Ռուբեն Հայրապետյանի «Բարի համբավին, պատվին, արժանապատվությանը և գործարար համբավին պատճառված վնասի հատուցման պահանջի մասին» քաղաքացիական գործով նախնական դատական նիստը։ Դատական նիստը նախագահում էր Էդուարդ Ամալյանը։ Դավիթ Սանասարյանի շահերը ներկայացնում էր Մհեր Արշակյանը։ Ռուբեն Հայրապետյանը լիազորել էր իր շահերը ներկայացնել փաստաբաններ Վահե Մովսիսյանին,Սայադ Բադալյանին,Արշակ Կարապետյանին և Կարեն Պետրոսյանին։

Դատավարության սկզբում պատասխանող կողմը միջնորդություն ներկայացրեց հայցվորի ներկայացուցչի լիազորությունները չճանաչելու մասին՝ պատճառաբանելով, որ Դավիթ Սանասարյանի ներկայացուցիչ Մհեր Արշակյանը, չունենալով փաստաբանի արտոնագիր, 2 այլ քաղաքացիական գործերում ևս ներկայացուցիչ է։ Տվյալ դեպքում խոսքը Հրանուշ Խառատյանի և Գարեգին Չուգասզյանի՝ ընդդեմ Ռուբեն Հայրապետյանի «Բարի համբավին, պատվին, արժանապատվությանը և գործարար համբավին պատճառված վնասի հատուցման պահանջի մասին» քաղաքացիական գործերի մասին է։

Դավիթ Սանասարյանի ներկայացուցիչ Մհեր Արշակյանը առարկեց այս միջնորդությանը՝ նշելով, որ ինքը պարբերաբար հանդես չի գալիս որպես ներկայացուցիչ, այլ տվյալ հայցերն ունեն միևնույն հիմքերն ու առարկան, և անհրաժեշտության դեպքում դատարանը կարող է միավորել դրանք մեկ վարույթում։ Մհեր Արշակյանը նաև նշեց, որ դատարանը արդեն իսկ այդ հարցին անդրադարձել է հայցադիմումը վարույթ ընդունելու մասին իր որոշմամբ, որով ճանաչել է, որ հայցադիմումը բավարարում է օրենսդրությամբ սահմանված չափանիշներին։

Դատական նիստը հետաձգվեց մինչև նոյեմբերի 22-ը՝ ժամը 16։00-ն։