Մեզ կոնկրետ դիվանագիտական գործողություններ են անհրաժեշտ՝ թշերի կմճտոցից անդին

Վարուժան Բաբաջանյանը facebook սոցցանցի իր էջում գրել է.

«ՔՅԱԲԱԲԱՅԻՆ ԴԻՎԱՆԱԳԻՏՈՒԹՅՈՒՆ

թշերի կմճտոցից մինչև էքստրադիցիա...

Ռամիլ Սաֆարովի արտահանձնման թեման, կարծես թե, դուրս եկավ լրատվական թոփ 10-ից: Հերթական անգամ զոհի կերպար քարոզելուց զատ հայ դիվանագիտական միտքը որևէ հոդաբաշխ գործողությունների ծրագիր չկարողացավ մշակել, մինչդեռ նմանատիպ իրադարձությունները սոսկ լալահառաչ հայտարարությունների առիթ չպետք է տային: Անհասկանալի է, թե ինչու հայ դիվանագիտական կորպուսը այլ պետությունների խորհրդարաններում Սաֆարովի էքստրադիցիան դատապարտող հայտարարություններ ընդունելու ուղղությամբ լոբբիստական աշխատանքներ չի կազմակերպում: Ինչու Հայաստանը բավարար ջանքեր չի գործադրում, որպեսզի միջազգային կառույցներում Հունգարիայի նկատմամբ պատժամիջոցներ կիրառվեն: Նման իրադարձությունների անպատժելիությունը ծնում է նմանատիպ այլ հանցագործություններ, հայը աշխարհում շարունակում է ընկալվել զոհի կերպարով, իսկ այստեղ մեր կառավարությունը վաճառում է ԱԳՆ-ի շենքը՝ հերթական քյաբաբնոց բացելու համար: Քյաբաբային դիվանագիտության արդյունքն էլ այս պետք է լինի. դիվանագիտական ապտակ - լալահառաչ հայտարարություններ - քյաբաբնոց շղթայում շարունակում են պարտակել ազգային խայտառակությունը...
Տարին մեկ անգամ անմեղ նահատակների շիրիմներին ծաղիկներ դնելով ազգային ինքնապահպանման խնդիրը չի լուծվի: Մեզ նոր Ապրիլի 24-եր պետք չեն...
Մեզ կոնկրետ դիվանագիտական գործողություններ են անհրաժեշտ՝ թշերի կմճտոցից անդին...

01.11.2012թ.»