Թուրքիայի և Ադրբեջանի միջև «մեկ ազգ՝ մեկ մշակույթ» գաղափարը նոր թափ է ստացել

Ադրբեջանական apa.az գործակալության տեղեկատվության համաձայն, որը հղում է անում թուրքական մի շարք լրատվամիջոցների, առաջիկայում Թուրքիայի Հանրապետությունն ու Ադրբեջանի Հանրապետությունը պատրաստվում են առավել ամրապնդել տնտեսական, էներգետիկ, արդյունաբերական, նավթաքիմիական ոլորտում առկա համագործակցությունը՝ այդ ոլորտներում ներկայացնելով  նոր նախագծեր: Ադրբեջանում Թուրքիայի դեսպան Իսմայիլ Ալփեր Ջոշգունը հայտարարություն է տարածել, համաձայն որի՝ ներկա ժամանակահատվածում թուրքական ներդրումներն Ադրբեջանում կազմում են ավելի քան 10 մլրդ ԱՄՆ դոլար, որը, ըստ դեսպանի, առաջիկա տարում թուրքական կողմը պատրաստվում է հասցնել ավելի քան 20 մլրդ ԱՄՆ դոլարի: Վերջինիս խոսքերով՝ 2011թ.-ին երկու երկրների միջև ապրանքաշրջանառությունը կազմել է 3,5 մլրդ ԱՄՆ դոլար, իսկ ընթացիկ տարում այն հասել է 5 մլրդ ԱՄՆ դոլարի: Անդրադառնալով ԼՂ հակամարտությանը՝ Թուրքիայի դեսպանը ընդգծել է, որ Ադրբեջանի անվտանգության խնդիրներն անմիջական կապված են Թուրքիայի Հանրապետության արտաքին քաղաքականության հիմնահարցերի հետ և թուրքական կողմը հետևողական է լինելու ԼՂ հիմնահարցը Ադրբեջանի տարածքային ամբողջականության համատեքստում լուծելու հարցում: Ադրբեջանում Թուրքիայի դեսպան Ի.Ա.Ջոշգունի հայտարարության համաձայն՝ Ադրբեջանի և Թուրքիայի Ռազմավարական համագործակցության խորհրդի հերթական 3-րդ նստաշրջանը անցկացվելու է 2013թ-ին Թուրքիայում, որի ընթացքում քննարկվելու են Կովկասյան տարածաշրջանում նոր մարտահրավերների հիմնահարցերը: