«ՀԺ». ՀՀ-ում ամենապահանջված գրքից մեկ տարվա մեջ նույնիսկ 1000 օրինակ չի վաճառվում

2011 թվականին երևանյան խոշոր գրախանութներում ամենամեծ պահանջարկ ունեցող գիրքը եղել է Հովհաննես Թումանյանի «Հեքիաթները»: Ընդհանրապես Հովհաննես Թումանյանը Հայաստանում բոլոր ժամանակների ամենապահանջված հեղինակն է: Այս տեսակետին է «Գրքերի աշխարհ» գրախանութների ցանցի մենեջեր Մարիամ Վարդանյանը: Նա հրաժարվել է «Հայկական ժամանակ»-ի թղթակցին ասել, թե նշված գրքից քանիսն է վաճառվել, ասել է միայն, որ ներկա պահին էլ վաճառվում է օրական 2-3 օրինակ, իսկ Ամանորի ընթացքում մինչև 10 օրինակ: Ամենակոպիտ հաշվարկով ստացվում է' տարվա ընթացքում 720 հատ (օրական երկու հատի դեպքում) կամ ենթադրենք' 800-900 հատ:

Այսինքն, ՀՀ-ում ամենապահանջված գրքից մեկ տարվա մեջ նույնիսկ 1000 օրինակ չի վաճառվում: Մեկնաբանությունն ավելորդ է: Վարդանյանն ասել է նաև, որ 2012 թ.-ի ընթացքում «Հեքիաթներին» գումարվել է նաև Պաոլո Կոելիոյի «Ալքիմիկոսը», որը վաճառվել է ամեն օր' վեց ամիս շարունակ (մեկ օրինակի դեպքում ստացվում է 180 հատ, երկուսի դեպքում 360): «Հեքիաթների» արժեքը 4300 դրամ է, «Ալքիմիկոս»-ինը' 1500: