Վրաստանը պատրաստ է վերականգնել երկաթգծային հաղորդակցությունը Ռուսաստանի հետ

Վրացական իշխանությունները պատրաստ են վերականգնել Ռուսաստանի հետ երկաթգծային հաղորդակցությունն «Աբխազիայի ապաիզոլացման ռազմավարության» շրջանակներում: Այս մասին հաղորդել է Վրաստանի վերաինտեգրման հարցերի նախարար Պատա Զաքարեշվիլին. հաղորդում է Комерсантъ-ը ուրբաթ օրը:

«Երկաթգծերի վերականգնումը կօգնի փախստականների ետ վերադարձման և խնդրի լուծման հարցում: Բացի այդ, տրանսպորտային հաղորդակցությունը կնպաստի Աբխազիայի տնտեսական զարգացմանը»,-ասել է Զաքարեշվիլին:

Նրա խոսքերով՝ երբ նախկինում Աբխազիայում տնտեսական դրությունը բարելավվում էր, փախստականների վերադարձը մեծ աճ էր գրանցում:

«Վրաստանի մասնակցությամբ որքան շատ տնտեսական ծրագրեր իրագործենք Աբխազիայում, այնքան մեծ կլինի հակամարտությունը կարգավորելու հնարավորությունը։ Բացի այդ, չի կարելի թույլ տալ, որ Աբխազիան տնտեսապես և տրանսպորտային միջոցներով կապված լինի միայն Ռուսաստանի հետ,-նշել է նախարարը, ապա շարունակել,-Եթե մենք չբացենք հաղորդակցությունը Վրաստանի կողմից, ապա Աբխազիան պարզապես այլընտրանք չի ունենա: Իսկ բացելու դեպքում այլընտրանքն ակնհայտ է։ Այդ երկաթգծից կարող են օգտվել Ռուսաստանը, Վրաստանը, Հայաստանը: Դրանով իսկ մեր պետության դերը տրանսպորտային զարկերակի և աշխարհաքաղաքական հարցերում կմեծանա:

Ես կարծում եմ, որ այստեղ պետք է անտեսել քաղաքական ենթատեքստը և հարցը դիտարկել միայն տնտեսական տեսանկյունից»,-ասել նա: