Միհրան Պողոսյանն աշխատանքային այցով մեկնել է Արարատի մարզ

Միհրան Պողոսյանն աշխատանքային այցով մեկնել է Արարատի մարզ

ՀՀ գլխավոր հարկադիր կատարող, արդարադատության գեներալ-մայոր Միհրան Պողոսյանն այսօր աշխատանքային այցով մեկնել է Արարատի մարզ՝ տեղում ծանոթանալու ԴԱՀԿ ապահովող ծառայության մարզային բաժնի խնդիրներին:

Համաձայն օրակարգի՝ ՀՀ գլխավոր հարկադիր կատարողը շրջայց է ունեցել Մասիսի, Վեդու բաժանմունքներում և տեղում ծանոթացել շենքային ու աշխատանքային պայմաններին:

Այնուհետև Արտաշատում՝ Արարտի մարզային բաժնում անցակցվել է աշխատանքային խորհրդակցություն, որի ընթացքում բաժնի պետն ու բաժանմունքների ղեկավարները, հարկադիր կատարողները ԴԱՀԿ ծառայության ղեկավարին են ներկայացրել այն խնդիրները, որոնք խոչընդոտում են իրենց պարտականությունների բնականոն կատարմանը: Նրանք հանդես են եկել նաև զեկույցներով և մի շարք առաջարկություններով' ուղղված հարկադիր կատարողների գործունեության արդյունավետության բարձրացմանը։ ՀՀ գլխավոր հարկադիր կատարողը գոհունակություն է հայտնել Արարատի մարզային բաժնի գործունեության կապակցությամբ և համոզմունք հայտնել, որ այսուհետ նրանք կլինել առավել նախաձեռնող և հետևողական:

«Հարկադիր կատարողը պետք է ոչ միայն բարեխղճորեն և պատասխանատու վերաբերվի իր աշխատանքային պարտականություններին, այլև մշտապես հիշի, որ իր առաքելությունն է ծառայել քաղաքացուն և պետությանը՝ բարձր պահելով սպայի պատիվը»-, ընդգծել է Միհրան Պողոսյանը:

Ամփոփելով խորհրդակցության արդյունքները՝ ՀՀ գլխավոր հարկադիր կատարողը համապատասխան հանձնարարականներ է տվել արձանագրված խնդիրների առնչությամբ: Մասնավորապես՝ հանձնարարվել է մեկամսյա ժամկետում ավարտին հասցնել Մասիսի բաժանմունքի տեխնիկական վերազինման գործընթացը: Քննարկվել են կազմակերպչական այլ հարցեր ևս:

Նշենք, որ ԴԱՀԿ ապահովող ծառայության Արարատի մարզային բաժնում 2011 թ. հարուցվել է 6979 կատարողական վարույթ: 2012թ. առաջին տասն ամիսների ընթացքում հարուցվել է 7484 կատարողական վարույթ, պահանջատերերի օգտին բռնագանձվել է 525 մլն ՀՀ դրամ: