ՀԱԿ-ը որպես ինքնուրույն քաղաքական գործոն այսօր չկա. Դավիթ Շահնազարյան

«Հայաստանում ներքաղաքական իրավիճակն աննախադեպ է, և եթե լիբերալ դաշտը որևէ հրաշքով չհամախմբվի, ապա տեղի կունենա ոչ թե ընտրություն, այլ՝ քվեարկություն»,- այսօր լրագրողների հետ հանդիպմանն ասաց ՀԱԿ նախկին անդամ Դավիթ Շահնազարյանը։

Դավիթ Շահնազարյանը նշեց, որ «Հայ ազգային կոնգրեսը» որպես ինքնուրույն քաղաքական գործոն այսօր չկա։

«Ի՞նչ կա արտաքուստ։ Հայաստանի քաղաքական համակարգը երկբևեռ է, մի կողմից իշխանությունը՝ որպես քրեաօլիգարխիկ համակարգ, մյուս կողմից՝ ԲՀԿ–ն՝ նույնպես որպես քրեաօլիգարխիկ համակարգ։ Խորհրդարանական ընտրություններից հետո այս իրավիճակը՝ հաստատել երկկուսակցական քաղաքական համակարգ, որևէ այլ հնարավորություն չի թողնում մյուս քաղաքական ուժերին դարձնել մարգինալ»,-ասաց Դավիթ Շահնազարյանը, ավելացնելով, որ «Բարգավաճ Հայաստան» կուսակցությունը չէ լուրջ քաղաքական որոշումներ կայացնողը, այլ այդ որոշումները կայացվում են հյուսիսում և ուղղակի փոխանցվում են ԲՀԿ-ին, իսկ որոշումը Ռուսաստանի կողմից դեռ չի կայացվել:

Ըստ Դավիթ Շահնազարյանի՝ հենց դրանով է պայմանավորված ԲՀԿ-ի խորհրդավոր լռությունը։

Այս պայմաններում, ըստ Դավիթ Շահնազարյանի, Հայաստանի քաղաքացիական հասարակությունը որևէ քաղաքական ընտրություն չունի, քանի որ երկու բևեռներն էլ քաղաքացիական հասարակության կողմից չեն կարող ունենալ որևէ դրական վերաբերմունք։

Անդրադառնալով ՀԱԿ առաջնորդ Լևոն Տեր-Պետրսյանի հետ բարեկամական կապերին և ՀԱԿ-ի հետ ունեցած քաղաքական տարաձայնություններին՝ Դավիթ Շահնազարյանը նշեց, որ քաղաքական տարաձայնություններն ու բարեկամական կապերը տարբեր են: