Մարդիկ վախեցած են. Մշակույթի նախարար

ՀՀ կառավարության համապատասխան որոշմամբ՝ մշակույթի շուրջ 63 անշարժ հուշարձաններ Հայաստանի մարզերից Երևանի պատմության թանգարան տեղափոխելու հարցն այսօր քննարկման առարկա դարձավ Ազգային Ժողովում 2013 թվականի բյուջեի քննարկման ժամանակ: Մասնավորապես անկուսակցական Էդմոն Մարուքյանն իր դժգոհությունն արտահայտեց այդ որոշման վերաբերյալ:

ՀՀ մշակույթի նախարար Հասմիկ Պողոսյանը լրագրողների հետ ճեպազրույցում նշեց, որ այդ ծրագրի դեմ դժգոհություններն անտեղի են, մանավանդ որ դրանք ոչ թե հուշարձաններ են, այլ հուշարձանապատկան բեկորներ:

«Այդ ցուցադրությունների կազմակերպման նպատակն այն է, որ այն ինչն այսօր վտանգված է, մենք առիթ ենք ունենում դրանք կարգի բերել, ու մաս-մաս մենք դա պետք է անենք և պարտավոր ենք անել»,-ասաց նախարարը, հավելելով, որ ցուցադրությունն ավելի է արժեքավորվում, երբ ասվում է, որ այսինչ բեկորը, կամ այսինչ հուշարձանը ցուցադրվել է մայրաքաղքում: «Այդ ձևով այն ավելի շատ ուշադրություն է հրավիրում: Ես չեմ հասկանում մտավախության պատճառները»:

Լուրեր.com-ի լրագրողի այն դիտարկմանը, թե դատելով նախարարի ասածներից՝ միջոցառումը միայն դրական նպատակ է հետապնդում, և այդ դեպքում այս բոլոր խոսակցություններն ընդամենը շահարկումնե՞ր են, ովքե՞ր են դրանց հետևում, և որն է նրանց նպատակը, Հասմիկ Պողոսյանն ասաց. «Լավ բան ենք անում, բայց ինչ-որ մեկը գտնում է, որ դա սխալ է: Մարդիկ վախեցած են, բայց ինչից՝ չեմ կարողանում հասկանալ: Մենք Հայաստանի տարածքից դա չենք հանում, ու վերջին հաշվով, եթե Հայաստանի տարածքից ժամանակավոր տանեինք որևէ տեղ ցուցադրելու, դա էլ էր խնդիր դառնալու, որովհետև, երբ մենք նույն խաչքարերը Լուվր էինք տանում, երբ մենք որմնանկարներն էինք հանում վերականգման, նույն աղմուկն էր: Հիմա այս բեկորներն են, և կրկին նույն աղմուկն է. այնպիսի տպարվորություն է, որ Երևանն ուրիշ պետություն, ուրիշ երկիր է: Երևանը դա այս երկրի մայրաքաղաքն է, այսինքն այդ մոտեցումներն ինձ համար անհասկաանլի են»,-նշեց նախարարը։