Ն.Ս.Օ.Տ.Տ. Արամ Ա Կաթողիկոսը խիստ քննադատության է ենթարկել Թուրքիային

Ուրբաթ օրը՝ դեկտեմբերի 23–ին, լիբանանյան OTV եւ հայաստանյան «Երկիր Մեդիա» հեռուստաալիքներին տված հարցազրույցի ընթացքում, Մեծի Տանն Կիլիկիո Արամ Ա. Կաթողիկոսը խիստ քննադատության է ենթարկել Թուրքիայի կեցվածքը թե՛ Միջին Արեւելքին առնչվող հարցերում և թե՛ Հայոց ցեղասպանության հարցով վերջերս Միացյալ Նահանգների ու Ֆրանսիայի կողմից կատարված դրական քայլերի նկատմամբ:

Նախ անդրադառնալով Միջին Արևելքում տեղի ունեցող իրադարձությունների վերաբերյալ Թուրքիայից Սիրիայի հասցեին հնչեցված այն հոխորտանքին, թե արյունահեղությամբ չի կարելի երկիր կերտել, Վեհափառ Հայրապետը հիշեցրեց, որ նախ Թուրքիան՝ «պետք է նայի իր պատմությանը, որն արյան, հալածանքի, կեղեքումի ու ջարդի պատմություն է»:

Իր հարցազրույցի վերջում Վեհափառ Հայրապետն անդրադարձավ նաև Ֆրանսիայի Խորհրդարանի կողմից Հայոց ցեղասպանության ժխտումը քրեականացնող օրինագծի ընդունմանը:

Նա ողջունեց Ֆրանսիայի խորհրդարանի այս քայլը՝ որպես մարդու իրավունքների նկատմամբ Ֆրանսիայի ունեցած հանձնառության շոշափելի արտահայտություն: Վեհափառ Հայրապետը դատապարտեց Թուրքիայի «աճող ժխտողական ու սպառնական ոգին»:

«Թուրքիան փոխանակ ժողովրդավարության դասեր տալու Ֆրանսիային, թող ինքը հարգի մարդու իրավունքները իր սահմաններից ներս»,– ասաց վեհափառը:

Նա նաև հայտնեց, որ գնահատանքի ու շնորհակալության նամակ է հղել Ֆրանսիայի նախագահ Նիկոլա Սարկոզիին:

Արամ Ա. Կաթողիկոսը իր խոր գնահատանքը հայտնեց նաև Ֆրանսիայի Հայ Դատի մարմնին՝ հորդորելով, որ նորոգված հավատքով ու նվիրումով Հայ Դատի Մարմինները շարունակեն իրենց աշխատանքն ամեն տեղ: