Միջհարևանային վեճ Վանաձորում. Լինգով հարվածներ է հասցրել որդուն ու հորը եւ դանակի հարվածներ ստացել

Օգոստոսի 26-ի գիշերը, ժամը 2.40-ին, «Վանաձոր» բժշկական կենտրոնից ոստիկանության Վանաձոր քաղաքի Բազումի բաժին ստացվել է հաղորդում, որ «կրծքավանդակի ծակած-կտրած վերքեր» ախտորոշմամբ բուժօգնության է տեղափոխվել Վանաձորի Բուլղարական ավանի բնակիչ, 28-ամյա մի տղամարդ:

Ոստիկանությունից հայտնում են, որ մեկնում է բաժնի օպերատիվ խումբը: Պարզվում է, որ տղամարդը վիրահատարանում է և ի վիճակի չէ հաղորդում տալ:

Նախաձեռնվում է քրեական վարույթ, ձեռնարկվում են անհետաձգելի գործողություններ, և շուտով հաջողվում է պարզել որոշ հանգամանքներ:

Բազումի քրեական հետախույզները համագործակցում են Լոռու մարզային վարչության գործընկերների հետ, և բացատրական աշխատանքի արդյունքում առավոտյան ժամը 6.15-ին ինքնակամ բաժին է ներկայանում տուժածի հարևան 20-ամյա երիտասարդը:

Նա պատմում է, որ ժամը 01.20-ի սահմաններում ինքը վիճաբանել է 28-ամյա հարևանի հետ, այդ ընթացքում փոխադարձ հարվածներ են հասցրել միմյանց, հարևանն իր մոտ եղած երկաթյա լինգով հարվածներ է հասցրել իրեն ու հորը, պատճառել մարմնական վնասվածքներ, այդ ընթացքում էլ ինքը իր մոտ եղած դանակով մի քանի անգամ հարվածել է հարևանի մարմնի տարբեր մասերին՝ պատճառելով մարմնական վնասվածքներ, որից հետո դանակը նետել է մոտակայքում և գնացել տուն:

Երիտասարդը հայտնել է նաև, որ վիճաբանությանը, հորից բացի, ներկա էր նաև եղբայրը:

Դանակահարող երիտասարդը ներկայացվել է Լոռու մարզային քննչական վարչություն, ձերբակալվել և տեղափոխվել է ձերբակալվածների պահման վայր: Դանակը հայտնաբերվել է:

Առավոտյան ժամը 8.08-ին Վանաձորի շտապօգնության աշխատակիցները Բազումի բաժնում բուժօգնություն են ցույց տվել դանակարողի 45-ամյա հորը և տեղափոխել հիվանդանոց: Ըստ բժշկական կենտրոնից ստացված հաղորդման՝ նրա մոտ ախտորոշվել է «ձախ արմնկային ելունի կոտրվածք»:

Նախաքննությունը շարունակվում է: Հարևանների միջև ծագած վեճի պատճառն ու դեպքի հանգամանքները նախաքննությամբ պարզվում են: