Փաշինյանի հայտարարությունները կարող են հիմք տալ Բաքվին սա մեկնաբանելու որպես ներադրբեջանական հակամարտություն․ Լեոնիդ Սլուցկի

«Տարածաշրջանում իրադարձությունների զարգացումը` լարվածության աճն ու անցումը ռազմական գործողությունների, խիստ մտահոգիչ է: ԲՈԼՈՐ կողմերը պետք է դադարեցնեն արյունահեղությունը, որն արդեն 25 մարդու կյանք է խլել, և վերադառնան բանակցությունների սեղանի շուրջ։ Դա ամենակարևորն է»,- Telegram-ի իր ալիքում գրել է ՌԴ Պետդումայի՝ միջազգային հարցերով հանձնաժողովի նախագահ, Ռուսաստանի լիբերալ-դեմոկրատական կուսակցության առաջնորդ Լեոնիդ Սլուցկին։

«Ղարաբաղյան հիմնախնդրի խաղաղ լուծման քայլերը հստակորեն շարադրված են Ռուսաստանի, Ադրբեջանի և Հայաստանի ղեկավարների եռակողմ հայտարարություններում։ Այնտեղ որոշվել է նաև ռուս խաղաղապահների կարգավիճակն ու գործունակությունը։ Ստեղծված պայմաններում խաղաղապահ առաքելությունը շարունակում է խաղաղ բնակչությանն աջակցել խնդիրների լուծման համար։

Այս համատեքստում ուզում եմ ուշադրություն հրավիրել Հայաստանի վարչապետ Նիկոլ Փաշինյանի 2022 թվականի հոկտեմբերին Պրահայում արված հայտնի հայտարարությանը Ալմա-Աթայի հիման վրա Ադրբեջանի Հանրապետության ինքնիշխանությունը ճանաչելու պատրաստակամության մասին։ 1991 թվականին Ալմա-Աթայի հռչակագրում նշվում է, որ Լեռնային Ղարաբաղի տարածքի հետ միասին Ադրբեջանի տարածքը 86,6 հազար քառակուսի կիլոմետր է: Այսինքն, փաստորեն, գրեթե մեկ տարի առաջ Փաշինյանը ստորագրել է, որ Ղարաբաղը Ադրբեջան է։

Հայաստանի ներկայիս ղեկավարության դիրքորոշումը, ըստ էության, կարող է Բաքվին հիմք տալ Լեռնային Ղարաբաղում ստեղծված իրավիճակը մեկնաբանելու՝ որպես ներադրբեջանական հակամարտություն»,-գրում է Սլուցկին։