Ուկրաինային խորհուրդ եմ տալիս միայն պաշտպանվել. Մասկ

Ամերիկացի միլիարդատեր, «X» սոցիալական ցանցի սեփականատեր, «SpaceX»-ի և «Tesla»-ի գործադիր տնօրեն Իլոն Մասկը «X» սոցիալական ցանցի իր էջում հայտնել է, որ ուկրաինական զինված ուժերը պետք է անցնեին պաշտպանության, սակայն արևմտյան երկրները ստիպեցին նրանց հակահարված տալ: 

«Մի քանի ամիս առաջ ես Ուկրաինային խորհուրդ էի տալիս պաշտպանությունն իր գլխավոր նպատակը դարձնել, սակայն Արևմուտքը համառորեն ստիպում էր նրան հարձակվել»,- գրել է նա։

Գործարարի խոսքով՝ «ամրացված դիրքերի վրա գրոհողները մեծ կորուստներ կունենան», ինչն էլ եղավ ուկրաինական բանակի հետ։

Ձեռնարկատիրոջ խոսքով՝ Ռուսաստանի զինված ուժերն այժմ ամենուր ճնշում են գործադրում Ուկրաինայի զինված ուժերի վրա և նոր տարածքներ են վերցնում իրենց վերահսկողության տակ։

Որոշ ժամանակ առաջ Մասկը չէր բացառել, որ Ուկրաինայի իշխանությունները կարող են կորցնել վերահսկողությունը Օդեսայի ու Խարկովի նկատմամբ, եթե հրաժարվեն Մոսկվայի հետ խաղաղ բանակցություններից։