Ցրտահարությունների դեպքերի թիվը վերջին 3 տարիներին առանձնապես չի փոխվել

ՀՀ տարածքում տարածված օդերևութաբանական երևույթների շարքին են դասվում կարկուտը, հորդառատ անձրևները, ուժեղ ձյունը, ուժեղ քամիները, ուժեղ մառախուղները և բուքը, սաստիկ շոգերը և ուժեղ սառնամանիքները, վաղ գարնանային և ուշ աշնանային ցրտահարությունները։ Այս մասին հայտնում են «Հիդրոօդերևութաբանության և մոնիթորինգի կենտրոն» ՊՈԱԿ-ից։

2023 թվականին հանրապետությունում դիտվել է ուժեղ մառախուղների 39 դեպք, որոնց թիվը 3-ով ավելի է 2022 թվականի և 6-ով ավելի՝ 2021 թվականի նկատմամբ։

Ուժեղ քամիների դեպքերի թիվն այս տարի 14-ն է, որը նախորդ 2 տարիների համեմատ 4-ով ավելի է։

 Ուժեղ անձրևներով դեպքերի թիվը նույնպես ավելացել է՝ կազմելով 14 դեպք, 2021 և 2022 թվականներին դիտվել է համապատասխանաբար 5 և 3 դեպք։

 Ի տարբերություն նախորդ 2 տարիների` 2023 թվականին ուժեղ ձյան դեպքեր չեն գրանցվել։

Ցրտահարությունների դեպքերի թիվը վերջին 3 տարիներին առանձնապես չի փոխվել։

 Սաստիկ շոգերով դեպքերի թիվը 2023 թվականին նվազել է՝ կազմելով 9 դեպք, իսկ սաստիկ սառնամանիքներ վերջին 3 տարիներին հանրապետության տարածքում չեն դիտվել։