Երևանի Արցախի փողոցի վթարային շենքերի 63 ընտանիքից 57-ի վերաբնակեցման խնդիրը լուծվել է

Երևանի Արցախի փողոցի 4-րդ նրբանցքի վթարային 3 շենքում բնակվող 63 ընտանիքից 57-ի վերաբնակեցման խնդիրն արդեն կարգավորվել է։ 

Այս մասին Երևանի քաղաքապետարանի գործակարգավարական խորհրդակցության ժամանակ տեղեկացրել է քաղաքապետարանի անշարժ գույքի կառավարման վարչության պետ Վահան Խաչատրյանը՝ զեկուցելով Արցախի փողոցի 4-րդ նրբանցքի չորրորդ կարգի վթարային շենքերի բնակիչների վերաբնակեցման ուղղությամբ իրականացված աշխատանքների մասին։

«Երեսուն ընտանիքի հատկացվել են բնակարաններ, 27 ընտանիքի՝ բնակարանի գնման վկայագրեր։ Մնացած 6 ընտանիքների հետ կա որոշ աշխատանքներ անելու խնդիր։ Վերջիններիս կողմից ներկայացվել են ոչ իրատեսական առաջարկներ։ Աշխատանքները վերջիններիս հետ շարունակվում են»,-մանրամասնել է Խաչատրյանը։

Քաղաքապետ Տիգրան Ավինյանը կարևորել է այն հանգամանքը, որ մեկ տարուց պակաս ժամկետում լուծվել է չորրորդ կարգի վթարային շենքերում բնակվող միանգամից 57 ընտանիքի խնդիրը։

Ավինյանի խոսքով՝ հաջորդ փուլում նախատեսվում է Արզումանյան փողոցի և մնացյալ չորրորդ կարգի վթարային շենքերի բնակիչների խնդիրների լուծումը։