Ադրբեջանի ԱԳՆ-ն պատասխանել է Նիկոլ Փաշինյանի առաջարկին

Ադրբեջանի արտաքին գործերի նախարարության մամուլի քարտուղար Այխան Հաջիզադեն արձագանքել է Հայաստանի վարչապետ  Նիկոլ Փաշինյանի՝ սպառազինությունների վերահսկման և չհարձակման պայմանագրի վերաբերյալ առաջարկին։

Հաջիզադեն պնդել է, թե իբր «Հայաստանի վարչապետի հայտարարությունը նպատակ ունի շեղել ուշադրությունը խաղաղության մասին երկկողմ համաձայնագրի նախագծի և Ադրբեջանի ու Հայաստանի միջև միջպետական ​​հարաբերությունների հաստատման գործընթացից»։

Բաքվի ԱԳՆ-ից հայտարարել են, թե նշված համաձայնագրի նախագծի քննարկման հենց սկզբից կոչ են արել հայկական կողմին «վերջ դնել Ադրբեջանի տարածքային ամբողջականության և ինքնիշխանության դեմ շարունակվող պահանջներին, սակայն Հայաստանն իբր գործնական քայլեր չի ձեռնարկել այդ ուղղությամբ»։

«Հայկական կողմից միջոցներ ձեռնարկելու փոխարեն գործնական նշանակություն չունեցող առաջարկներ հնչեցնելը թյուրիմացություն է ստեղծում և անընդունելի է»,-ասել է Հաջիզադեն։

«Հաշվի առնելով վերը նշվածը, ինչպես նաև այն, որ, ինչպես հայտարարեց վարչապետ Փաշինյանը, իր երկիրը վարում է ռազմականացման լուրջ քաղաքականություն, վերջին տարիներին կնքվել են պայմանագրեր մի քանի միլիարդ դոլարի զենքի մատակարարման, ռազմական արդյունաբերության զարգացման համար, Հայաստանի այն պնդումը, թե լրջորեն են վերաբերվում խաղաղության գործընթացին, «քաղաքական շահարկում է»։ Նման «կողմնակալ հայտարարությունները» խոչընդոտում են տարածաշրջանում հետագա զարգացմանը և առաջընթացին՝ հիմնված միջազգային իրավունքի նորմերի և սկզբունքների հարգման վրա»,-ասված է հաղորդագրության մեջ։

Հիշեցնենք՝ երեկ Փաշինյանը հայտարարել է, որ անվտանգության երաշխիքների մի քանի մեխանիզմներ են առաջարկել Ադրբեջանին: Նա հայտնել է, որ Հայաստանը սահմանի դեմիլիտարիզացիա, այսինքն՝ ապառազմականացում է առաջարկել Ադրբեջանին, նաև սպառազինությունների փոխադարձ վերահսկման մեխանիզմ, նաև չհարձակման մասին պայմանագրի ստորագրում։