«Ի՞նչ սկզբունքով են Մոսկվայում ՀՀ դեսպանատանը մարդկանց հրավիրել Հայոց բանակի օրվան նվիրված ընդունելությանը»

Երեկ Մոսկվայում Հայաստանի դեսպանատանը ընդունելություն է տեղի ունեցել՝ ի պատիվ Հայոց բանակի օրվա։ Այս մասին գրում է «SisMasis» տելեգրամյան ալիքը։

«Ուրախալի է, որ դեսպանատունը որոշել է նման ընդունելություն կազմակերպել՝ ի տարբերություն նախորդ տարվա։ Որովհետև դիվանագիտության մեջ նման միջոցառում չանցկացնելը նշանակում է բանակի և պետության «լուծում»։

Բայց տարօրինակ է դեսպան Վաղարշակ Հարությունյանի և նոր ռազմական կցորդ Գարեգին Մելիքսեթյանի, ով ընդհանրապես նոր մարդ է բանակում, հրավիրյալների անսկզբունքային ու քաոսային մոտեցումը։ Բացի Մոսկվայում գործող մի շարք դեսպանատների ռազմական կցորդներից և ռուս պաշտոնյաներից, ընդունելության ներկաները նկատել են համակարգից դուրս շատ մարդկանց, ովքեր միայն անձնական հարաբերություններ և հետաքրքրություններ ունեն դեսպանատան տարբեր կցորդների հետ։ Բայց այս ամենի «գագաթնակետը» Մոսկվայի «Lotte Plaza» հյուրանոցի մենեջերների ներկայությունն էր Հայոց բանակի օրվան նվիրված ընդունելությանը։ Իսկ դա «բացատրելի» է հայ դիվանագետների և ռազմական կցորդի պահվածքի տեսանկյունից։ Նրանք ժամանակ են անցկացնում այս հյուրանոցում, նրանց հաճախ կարելի է տեսնել այս հյուրանոցի ռեստորաններում և սրճարաններում։

Իսկ շատերը, ինչպես ինձ ասացին, ընդունելության ժամանակ փնտրում էին հայկական բանակի հիմնադիրներից մեկին՝ գեներալ-լեյտենանտ Նորատ Տեր-Գրիգորյանցին, որին, պարզվում է, չէին հրավիրել։ Հետաքրքիր է, եթե Հայաստանի ՊՆ ղեկավարությունը տեղյակ է այս մասին, կարո՞ղ է պատասխանել հարցին, թե Մոսկվայում հայկական բանակի ներկայացուցիչ Մելիքսեթյանն ի՞նչ սկզբունքով է մարդկանց հրավիրում ընդունելության»,– ասված է հրապարակման մեջ։