ԼՂ-ից բռնի տեղահանված բազմաթիվ անձինք Շիրակի մարզ տեղափոխվելու ցանկություն են հայտնում

Լեռնային Ղարաբաղից բռնի տեղահանված ընտանիքների թիվը Շիրակի մարզում օրեցօր ավելանում է։

Այս մասին լրագրողներին ասաց Շիրակի մարզպետ Մուշեղ Մուրադյանը։

Ըստ մարզպետի՝ հունվարի 30-ի դրությամբ մարզում ապաստան է գտել Լեռնային Ղարաբաղից բռնի տեղահանված 4067 քաղաքացի՝ 1067 ընտանիք։ Չնայած մարզում առկա խնդիրներին, այս պահին էլ կան ընտանիքներ, որոնք ցանկանում են տեղափոխվել Շիրակի մարզ։ 

«Լեռնային Ղարաբաղից բռնի տեղահանված հայրենակիցներին աջակցության ցուցաբերումը, նրանց կեցության ու կարիքների լուծումը 2023 թվականի աշխատանքային կարևոր ուղղություն է եղել ու հիմա էլ կա։ Առաջին իսկ օրվանից մարզպետի աշխատակազմում ձևավորված աշխատանքային հանձնաժողովն արել է հնարավորը մեր քույրերին ու եղբայրներին հուզող հարցերին հնարավորինս արագ լուծում տալու համար։ Մարզի դպրոցներում ուսումը շարունակում է 684 աշակերտ, բուհերում՝ 49 ուսանող։ 24 բուժհաստատություններում հաշվառվել է 2856 քաղաքացի, դեղորայք է ստացել, ստացիոնար բուժման և լաբորատոր-գործիքային հետազոտության է ուղեգրվել 548 քաղաքացի»,-նշեց մարզպետը՝ տեղեկացնելով, արդեն հաջողվել է ԼՂ-ից բռնի տեղահանված 44 անձի աշխատանքի տեղավորման հարց լուծել։