ՔՊ-ն ասում է՝ այն անձը, որը չի անցել իրենց թրի տակով, տեղ չունի պետական համակարգում․ Արծվիկ Մինասյան

«Հայաստան» խմբակցության պատգամավոր Արծվիկ Մինասյանը այսօր ԱԺ-ում իր ելույթում անդրադարձավ նախօրեին՝  ՔՊ-ական պատգամավորների կողմից ահմանադրական դատարանի դատավորի քվեարկությունը բոյկոտելուն․ 

«Սա քաղաքական նոնսենս է, անտրամաբանություն, երբ իշխանությունը բոյկոտում է իր իսկ սահմանադրական պարտականության կատարումը՝ չտալով որևէ հիմնավորում։ Ս ա ուղերձ է ձեզ, սիրելի՛ հայրենակիցներ, որ քաղաքական մեծամասնությունն ասում է՝ այն անձը, որն իրենց սրտով չէ, որը չի անցել իրենց թրի տակով կամ այն անձը, որը կփորձի  ցուցաբերել որոշակի օբյեկտիվություն, համարձակություն՝ առաջնորդվելու իրավունքի գերակայությամբ, Սահմանադրությամբ, այդ անձը տեղ չունի պետական համակարգում, ավելին՝ սահմանադրական արդարադատության համակարգում։ Եվ երկրորդը՝ ուղերձ է այն մասին, որ եթե մենք ուզում ենք որևէ մեկին բերենք, ուրեմն ամեն ինչ անելու ենք, որ բերենք»,- նման տեսակետով հանդես եկավ ընդդիմադիր պատգամավորն ու թեման շարունակելով իր խոսքն ուղղեց դատավորներին․

«Հարգելի՛ դատավորներ, եկել է ձեր արժանապատվությունը վերահաստատելու ու պահելու ժամանակը, դուք իշխանության այս վարքագծին պետք է արձագանքեք, դուք պետք է որոշում կայացնեք՝ ենթարկվո՞ւմ եք իշխանության բռնաճնշումներին»։

Հիշեցնենք՝ երեկ՝ փետրվարի 28-ին, Դավիթ Բալայանը չընտրվեց Սահմանադրական դատարանի դատավոր․ ՔՊ խմբակցությունը չէր մասնակցել քվեարկությանը։