G7-ը սպառնացել է Իրանին նոր պատժամիջոցներով

G7-ի երկրներն ուրբաթ օրը նախազգուշացրել են, որ մտադիր են նոր հակաիրանական պատժամիջոցներ կիրառել, եթե Թեհրանն սկսի Ռուսաստանին բալիստիկ հրթիռներ մատակարարել։ Այս մասին գրում է The Wall Street Journal-ը (WSJ)՝ հղում անելով G7-ի հայտարարությանը։

«Եթե Իրանն սկսի բալիստիկ հրթիռներ կամ նման տեխնոլոգիաներ մատակարարել Ռուսաստանին, պատրաստ ենք արագ արձագանքել՝ համակարգված կերպով, այդ թվում՝ Իրանի դեմ նշանակալի նոր պատժամիջոցների միջոցով», - մեջբերում է WSJ-ն փաստաթղթից մի հատված։

Սակայն հրատարակությունը նշում է, որ Արևմուտքը որևէ նշան չի տեսել, որ Թեհրանը դիտարկում է Ռուսաստանին հրթիռներ մատակարարելու հնարավորությունը։ Սակայն G7-ը մտահոգություն է հայտնել, որ Իրանը չի բացառում նման տարբերակը։

«Մենք չափազանց անհանգստացած ենք տեղեկություններով, որ Իրանը ուսումնասիրում է բալիստիկ հրթիռներ և նման տեխնոլոգիաներ Ռուսաստանին փոխանցելու հնարավորությունը: (...) Մենք կոչ ենք անում Իրանին չանել դա», - ասվում է G7-ի հայտարարության մեջ: