Օ՛Բրայենը բացահայտել է Բրյուսելում եռակողմ հանդիպման նպատակը

Եվրոպայի եւ Եվրասիական տարածաշրջանի հարցերով բյուրոյի քարտուղարի տեղակալ Ջեյմս Օ’Բրայենն ամփոփել է Բրյուսելում կայացած եռակողմ հանդիպման արդյունքները։

Օ՛Բրայենը նշել է, որ ԱՄՆ պետքարտուղարը և Եվրահանձնաժողովի նախագահն ընդգծել են իրենց ամուր աջակցությունը Հայաստանի անկախությանը, ինքնիշխանությանը և տարածքային ամբողջականությանը։

«Նրանք նաև հիացմունք են հայտնել 2018 թվականի Թավշյա հեղափոխությունից ի վեր երկրում իրականացված ժողովրդավարական բարեփոխումների կապակցությամբ և աջակցություն են հայտնել համաշխարհային տնտեսության և քաղաքական համակարգի ստեղծմանը, որն արտացոլում է հայ ժողովրդի ժողովրդավարական նկրտումները»,– հայտնել է նա։

Օ՛Բրայենի խոսքով՝ հանդիպման նպատակն էր քննարկել Հայաստանում ընթացիկ բարեփոխումները և կոչ անել շարունակել խաղաղության գործընթացն Ադրբեջանի հետ։

«Կողմերը նշել են, որ Հայաստանի և Ադրբեջանի միջև կնքված խաղաղության համաձայնագիրը երկարաժամկետ հեռանկարում կնպաստի տարածաշրջանի անվտանգությանն ու բարգավաճմանը, ներառյալ Միջերկրական ծովից Կենտրոնական Ասիա նոր առևտրային ուղիների զարգացումը»,– հայտնել է Եվրոպայի եւ Եվրասիական տարածաշրջանի հարցերով բյուրոյի քարտուղարի տեղակալը։

Նա նաև տեղեկացրել է, որ ԱՄՆ-ն և Հայաստանն ուսումնասիրում են քաղաքացիական միջուկային էներգետիկայի ոլորտում համագործակցության հնարավորությունները։

«Եվրոպական միությունն արդեն սկսել է սերտ համագործակցություն Հայաստանում գոյություն ունեցող միջուկային էներգիայի աղբյուրների անվտանգության և արդյունավետության բարձրացման ուղղությամբ։ Եվ այդ համագործակցությունն ընդլայնվում է»,- ասել է Օ’Բրայենը՝ նշելով, որ երբ Հայաստանը կշռադատի փոխարինման իր տարբերակները, ԱՄՆ–ն կֆինանսավորի տեխնիկատնտեսական ոլորտը, կանցկացնի գիտական փոխանակումներ՝ նոր հնարավորությունների բացահայտման համար և կսկսի ուսումնասիրել Հայաստանի տնտեսության դիվերսիֆիկացման ֆինանսավորման տարբերակները։