Ադրբեջանից իսրայելական ռազմուժի դուրսբերման մասին լուրը ադրբեջանական կողմի համար բավականին հավանական վտանգավոր իրավիճակ է ստեղծում. իրանագետ

Եթե Ադրբեջանից Իսրայելի կողմից իր ռազմական ուժերը , նաև զենքը Ադրբեջանից հետ կանչելու լուրերը ճիշտ են, դեզինֆորմացիա չէ, ապա սա երկու խնդրի մասին է վկայում, այն է՝ Իսրայելն, այնուամենայնիվ, ռազմական ներկայություն Ադրբեջանում ունի և այդ ռազմական ներկայությունն ուղղված էր Իրանի դեմ։ «Փաստինֆո»-ին ասել է իրանագետ Գարիկ Միսակյանը՝ նկատելով, որ, եթե, ըստ որոշ չհաստատված լուրերի, դուրս են բերվում, ապա դա սրացման մասին է վկայում։

Նրա դիտարկմամբ՝ իսրայելական ռազմուժի դուրսբերման մասին լուրը՝ Իրանի և Իսրայելի այս լարվածության պայմաններում, նաև ադրբեջանական կողմի համար բավականին հավանական վտանգավոր իրավիճակ է ստեղծում։ «Բայց, կարծում եմ, Իսրայելը նաև չի հրաժարվելու Ադրբեջանում իր ներկայությունից որովհետև Իրանի հարևանությամբ այդ բավականին ուժեղ ներկայությունը նաև Իսրայելին է պետք այս փուլում։ Սա կարող է լինել դեզինֆորմացիա, կարող է լինել նաև ինֆորմացիա, որը հետագայում ուղղվելու է Ադրբեջանի դեմ, բայց սա նաեւ վկայում է, որ Իրան- Ադրբեջան հարաբերություններում դրական դինամիկա չի նկատվելու։ Մեզ համար սա ևս մեկ անգամ հաստատում է, որ Իսրայելն, այնուամենայնիվ, ուներ այդ ներկայությունը Ադրբեջանական Հանրապետությունում»,- արձանագրեց իրանագետը։

Նա նաեւ ուշադրություն հրավիրեց տեղեկատվական այն արտահոսքերի վրա, որ Իրանին հարվածել են Ադրբեջանի տարածքում ներկա իսրայելական ուժերը։ «Այս լարված փուլում նմանատիպ հայտարարությունները և ինֆորմացիոն արտահոսքերը բավականին շատ են»,- արձանագրեց նա։