Գազայի բնակչության 90 %-ը տեղաhանվել է. ՄԱԿ

Գազայի հատվածի բնակչության գրեթե 90%-ը տեղահանվել է 2023 թվականի հոկտեմբերին տարածաշրջանում Իսրայելի ռազմական գործողությունների մեկնարկից հետո։ Այս մասին հայտնում է WAFA պաղեստինյան լրատվական գործակալությունը՝ վկայակոչելով ՄԱԿ-ի Մարդու իրավունքների գերագույն հանձնակատարի գրասենյակի տվյալները։

Գազայի տեղահանված բնակիչները սահմանափակված են տարածքով, որը կազմում է գոտու ընդհանուր տարածքի ընդամենը մեկ տասներորդը, ասում է գործակալությունը:

ՄԱԿ-ի Մարդու իրավունքների գերագույն հանձնակատարի գրասենյակը նույնպես հայտարարություն է տարածել՝ նշելով, որ միայն օգոստոսին իսրայելական ուժերը տարհանման 12 հրաման են տվել՝ ստիպելով 250 հազար մարդու կրկին լքել իրենց տները։

Ըստ հաղորդագրության` ապաստարանները գերբնակեցված են, աղտոտված և վտանգված: Մարդիկ զրկված են բուժհաստատություններից, մաքուր ջրից և մարդասիրական պաշարներից։ Քլորի կտրուկ պակասը թույլ չի տալիս ախտահանել ջուրը, ինչը տարբեր հիվանդություններ է առաջացնում։

Իր հերթին, պաղեստինյան WAFA գործակալությունը հայտնում է, որ Գազայի առողջապահական իշխանությունների տվյալներով՝ իսրայելական հարձակման սկզբից տուժել է ավելի քան 133 հազար պաղեստինցի՝ ներառյալ սպանվածները և վիրավորները, որոնց մեծ մասը երեխաներ և կանայք են։ Բացի այդ, ավելի քան 10 հազար մարդ մնում է անհետ կորած։