Պատերազմի նախօրեին խնջույք կազմակերպելու գործով դատարանում որպես վկա հարցաքննվել է Օնիկ Գասպարյանը. Փաստ

44-օրյա պատերազմի նախօրեին խնջույք կազմակերպելու դրվագով մեղադրվող Սևակ Աբրահամյանի գործով շուրջ 2 տարի տևող դատավարության ընթացքում դատակոչված 51 վկաներից միայն չորսն են հարցաքննվել։ Գործով դատաքննությունը ձգձգվում է՝ տարբեր պատճառներով, ինչպես «Փաստինֆո»-ի հետ զրույցում ասել է պաշտպան Արման Թամրազյանը՝ ոչ պաշտպանության կողմի մեղքով։

Այս ընթացքում դատարանում հարցաքննվել են Օնիկ Գասպարյանը, Կարեն Շաքարյանը։ Փակագծեր չբացելով՝ փաստաբանը հայտնեց․ որ այդ ցուցմունքներն արդեն իսկ բավարար են, որ արդարացման դատական ակտ կայացվի։

Դատաքննության ընթացքում փոփոխվել է մեղադրյալ Սևակ Աբրահամյանի խափանման միջոց կալանքը, շուրջ վեց ամիս է՝ նա տնային կալանքի տակ է։

Հիշեցնում են, որ Արցախի Մարտակերտի շրջանի Թալիշ և Մատաղիս գյուղերի պաշտպանությունը պատշաճ չկազմակերպելու մեղադրանքով բարձրաստիճան սպա էր կալանավորվել: Ըստ մեղադրանքի՝ հրամանատար Սևակ Աբրահամյանը պատերազմի մեկնարկի նախորդ օրը բանակի շուրջ 100 սպաների մասնակցությամբ կազմակերպել է խնջույք, որի ընթացքում թեև տեղեկատվություն է ստացել, որ առաջնագծում հակառակորդի կուտակումների կան եւ պատերազմի վտանգը մեծ է, անձնակազմին մարտական պատրաստություն չի բերել եւ ոչինչ չի արել հակառակորդի հարձակումը կանխելու, դրան դիմագրավելու համար:

Բացի այդ` գնդապետը հարձակման պահին նույնպես չի կատարել իր պարտավորությունները, անգործություն է դրսեւորել, ինչի հետեանքով ադրբեջանական կողմը ժամերի ընթացքում կարողացել է ճեղքել պաշտպանական գիծն ու մխրճվել թիկունքային հատվածներ: Այդ պայմաններում հայկական կողմը չի կարողացել պաշտպանության անցնել, ինչը հանգեցրել է նրան, որ ադրբեջանական կողմը գրավել է գերիշխող բարձունքները եւ հրամանատարական դիտակետերը, մխրճվել պաշտպանության խորքը` զորամասի անձնակազմին ստիպելով նահանջել: Դրա հետևանքով հակառակորդի վերահսկողության տակ են անցել Մարտակերտի շրջանի Թալիշ եւ Մատաղիս գյուղերը: Քրեական գործն ի սկզբանե գտնվել է Սյունիքի մարզի ընդհանուր իրավասության դատարանի դատավոր Մուշեղ Արամյանի վարույթում, ապա տեղափոխվել Երևան և այժմ գտնվում է դատավոր Արտուշ Գաբրիելյանի վարույթում։ Դատաքննության ընթացքում Սևակ Աբրահամյանի խափանման միջոց կալանքը փոխարինվել է տնային կալանքով։