Անարդար է․ Ալիևը գնահատել է Արևմուտքի առաջնորդների վերաբերմունքը Թրամփի նկատմամբ

Մի շարք արևմտյան քաղաքական գործիչներ ԱՄՆ նախագահ Դոնալդ Թրամփի հանդեպ շատ անարդար են վարվել նախքան նրա՝ նախագահի պաշտոնը ստանձնելը, և այժմ մտահոգված են դրա համար։ Այս մասին չինական CGTN հեռուստաալիքին տված հարցազրույցի ժամանակ հայտարարել է Ադրբեջանի ղեկավար Իլհամ Ալիևը։

Նա նշել է, որ եվրոպական պետությունների ղեկավարները գտնվում են մեծ անորոշության մեջ՝ Սպիտակ տան ներկայիս ղեկավարի պատճառով։

«Սրա պատճառը շատ պարզ է. մենք բոլորս գիտենք, թե նրանցից ոմանք ինչպես էին վերաբերվում Թրամփին վերջին չորս տարիներին, երբ նա նախագահ չէր: Արևմտյան որոշ առաջնորդներ շատ անարդար են վարվել Թրամփի նկատմամբ, և, իհարկե, նրանք մտահոգված են, որ հիմա, թերևս, եկել է պատասխանատվություն կրելու ժամանակը»,- ​​ասել է Ալիևը։

Նրա խոսքով, արևմտյան քաղաքական գործիչներից մեկի «որակազրկումն» արդեն տեղի է ունեցել։ Խոսքը Կանադայի վարչապետ Ջասթին Թրյուդոյի հրաժարական տալու ծրագրերի մասին է։