Չինաստանը դեմ է ԱԻ-ի ոլորտում միջազգային համագործակցության քաղաքականացմանը

Չինաստանի իշխանությունները աջակցում են արհեստական ​​ինտելեկտի (ԱԻ) ոլորտում միջազգային համագործակցությանը և անընդունելի են համարում համապատասխան գիտատեխնիկական խնդիրների քաղաքականացումը։ Այս մասին հայտարարել է Չինաստանի ԱԳՆ պաշտոնական ներկայացուցիչ Գու Ցզյակունը, գրում է ՏԱՍՍ-ը։

«Մենք նաև ակտիվորեն խթանում ենք արհեստական ​​ինտելեկտի ներառական զարգացումը, օգնում զարգացող երկրներին ամրապնդել այն։ Միաժամանակ մենք դեմ ենք գաղափարախոսության վրա հիմնված սահմանների գծմանը, ազգային անվտանգության հայեցակարգի ընդհանրացմանը, տնտեսական, առեւտրային, գիտատեխնիկական խնդիրների քաղաքականացմանը», - ճեպազրույցում ընդգծել է նա՝ մեկնաբանելով ամերիկյան կողմի դիրքորոշումը, որը հրաժարվել է համատեղ հայտարարություն ստորագրել Փարիզում արհեստական ​​ինտելեկտի թեմայով համաժողովում։

Ինչպես պարզաբանել է չինացի դիվանագետը, Պեկինը «ակտիվորեն աջակցում է» համագործակցությանը և փոխակերպմանը արհեստական ​​ինտելեկտի ոլորտում։

Գուո Ցզյակունը նշել է, որ Չինաստանը «ակտիվորեն նպաստում է» նորարարական զարգացմանը, մեծ ուշադրություն է դարձնում արհեստական ​​ինտելեկտի անվտանգության ապահովման հարցերին և խրախուսում է ձեռնարկություններին այս ոլորտում գործունեություն ծավալել։