Չինաստանը հերթական անգամ հասկացրել է Ճապոնիային, որ նրան չի զիջի վիճելի կղզիները

Չինական ծովային ոստիկանության նավակները պարեկել են վիճելի Դիաոյու (Սենկակու) կղզիների շրջակայքի ջրերում: Այս մասին հայտնում է ТАСС-ը՝ հղում անելով ՉԺՀ-ի առափնյա պահպանության վարչությանը:

Ինչպես պարզաբանել են գերատեսչությունում, պարեկության նպատակն է պաշտպանել ՉԺՀ-ի շահերը Արևելաչինական ծովի նշված ջրերում։

Վերջերս Սպիտակ տանը ԱՄՆ նախագահ Դոնալդ Թրամփի և Ճապոնիայի վարչապետ Շիգերու Իշիբայի հանդիպման ժամանակ, որը տեղի ունեցավ վերջինիս Վաշինգտոն կատարած այցի շրջանակներում, կողմերը հաստատեցին, որ ԱՄՆ-ի և Ճապոնիայի միջև փոխադարձ համագործակցության և անվտանգության պայմանագրով իրենց փոխադարձ պարտավորությունները տարածվում են նաև Արևելաչինական ծովի վիճելի Սենկակու կղզիների վրա։ Հայտարարության համաձայն՝ ԱՄՆ-ը նաև վերահաստատել է իր «անդրդվելի հանձնառությունը՝ պաշտպանելու Ճապոնիան՝ օգտագործելով իր հնարավորությունների ողջ շրջանակը՝ ներառյալ միջուկային ուժերը»:

Դրանից հետո Չինաստանի ԱԳՆ Ասիայի հարցերով դեպարտամենտի տնօրեն Լյու Ցզինսոնը հանդիպել է Չինաստանում Ճապոնիայի դեսպանատան գլխավոր նախարար Յոկոչի Ակիրային, որտեղ նա լուրջ մտահոգություն և խիստ դժգոհություն է հայտնել Ճապոնիայի վարչապետի և ԱՄՆ նախագահի բանակցությունների ընթացքում Չինաստանի մասին արված բացասական հայտարարությունների կապակցությամբ։

Ճապոնիայի և Չինաստանի միջև շարունակվում է տարածքային վեճը Արևելաչինական ծովի Սենկակու (Դիաոյու) կղզիների շուրջ։ Տոկիոյի տվյալներով՝ կղզիները ճապոնական են 1895 թվականից։ Ըստ չինական կողմի՝ 1783 և 1785 թվականների ճապոնական քարտեզները Դիաոյուն ցույց են տվել՝ որպես չինական տարածք։

Երկրորդ համաշխարհային պատերազմից հետո կղզիները գտնվում էին ԱՄՆ վերահսկողության տակ և 1972 թվականին, Օկինավա կղզու հետ միասին, հանձնվեցին Ճապոնիային։ Չինաստանը կարծում է, որ Ճապոնիան ապօրինի է պահում կղզիները։ Միաժամանակ, Ճապոնիան պնդում է, որ կղզիները միշտ եղել են Օկինավայի պրեֆեկտուրայի անբաժանելի մասը և իրավամբ պատկանում են նրան։