Հիլարի Քլինթոնը խոստանում է Թուրքիայի վրա ճնշում գործադրել եկեղեցիների վերադարձի հարցով

Հիլարի Քլինթոնը պատասխանել է Ամերիկայի Հայ Դատի հանձնախմբի ատենապետ Քեն Խաչիկյանի՝ օգոստոսի 15-ին իրեն ուղղած նամակին։

Թուրքիայում ԱՄՆ դեսպան Ֆրենսիս Ռիկարդոնեի այն հայտարարությունից հետո, թե մինչեւ 1915 թվականը Թուրքիայի տարածքում գործած քրիստոնեական եկեղեցիների մեծ մասը շարունակում է գործել իբրեւ եկեղեցի, Ամերիկայի Հայ Դատի հանձնախումբը ԱՄՆ արտաքին գործոց նախարարությանը նամակ էր հղել՝ ամբողջական եւ պաշտոնական հաստատում պահանջելով այն մասին, որ ներկայիս Թուրքիայի տարածքում գործած քրիստոնեական եկեղեցիների մեծ մասը ոչնչացված եւ պղծված է Օսմանյան Թուրքիայի եւ Թուրքիայի Հանրապետության կառավարությունների կողմից, եւ որ պահպանված եկեղեցիները պետք է վերադարձվեն օրինական տերերին՝ հայերին, հույներին, ասորիներին ու այլ փոքրամասնություններին։ Ամերիկայի Հայ Դատի հանձնախումբը պահանջել էր նաեւ, որ դեսպան Ռիկարդոնեն ներողություն խնդրի։

Հիլարի Քլինթոնն իր պատասխան նամակում մասնավորապես ասել է. «Թուրք ղեկավարների հետ հանդիպումների ժամանակ մենք շարունակ ընդգծել ենք այն կարեւորությունը, որ մենք տալիս ենք Թուրքիայում դավանանքի ազատությանը։ Ինչպես նաեւ Թուրքիայի իշխանությունների հետ ամենաբարձր մակարդակներով հանդիպումների ժամանակ մենք շարունակում ենք բարձրացնել մեր մտահոգությունը նախապես բռնագրավված գույքը կրոնական համայնքներին վերադարձնելու առնչությամբ։ Այդ առնչությամբ, մենք ուշադիր պիտի հետեւենք Թուրքիայի կառավարության՝ օգոստոս 27-ի այն որոշման իրականացմանը, որը նախատեսում է ոչ իսլամական համայնքների 162 հիմնադրամներին վերադարձնել բռնագրավված անշարժ գույքը»։

Ամերիկայի Հայ Դատի հանձնախումբը Քլինթոնին ուղղված պատասխան նամակում ողջունել է Միացյալ Նահանգների պետքարտուղարի հրապարակային առաջին հայտարարությունը, թե կառավարությունը կրոնական համայնքների գույքը վերադարձնելու համար ճնշում է գործադրում Թուրքիայի վրա։ Այս մասին հաղորդում է հունաստանում լույս տեսնող հայկական «Ազատ օր» օրաթերթը։