Հայցից պետք է հրաժարվեն. Վահագն Դալլաքյան (տեսանյութ)

Հակակոռուպցիոն դատարանում՝ դատավոր Կարապետ Բադալյանի նախագահությամբ, այսօր շարունակվեց ՀՖՖ նախկին նախագահ, ԱԺ նախկին պատգամավոր Ռուբեն Հայրապետյանի՝ ենթադրյալ ապօրինի գույքի բռնագանձման պահանջով գործով հերթական դատական նիստը: 

Ռուբեն Հայրապետյանի փաստաբան Վահագն Դալլաքյանը իր խոսքում նշեց, որ արդեն մեկ ամիս է՝  ինչ Սահմանադրական դատարանի որոշումը կայացվել է:

«Մենք չգիտենք՝ մյուս գործերով ինչ վիճակ է, ինչ  քննարկումներ են տեղի ունենում և այս գործով ակնհայտորեն հայցը անհիմն է ՍԴ-ի որոշման կոնտեքստում»: 

Դալլաքյանը նշեց նաև, որ սույն գործի հիմքը ենթադրյալ հանցագործությունն  է և ենթադրյալ հանցանքի հիմքով ցանկացած քաղաքացի կարող է լինել պատասխանող: 

Փաստաբանի խոսքով՝ ՍԴ-ի որոշման այդ հատվածը վերաբերում է նրան, որ որևէ գույք կարող է համարվել ապօրինի այս օրենքի կոնտեքստում, եթե այն ինչ-որ կերպ ձեռք է բերվել հանցագործության արդյունքում:

Այս գործում ենթադրյալ հանցանքը տեղի է ունեցել ասենք 2014-15 թթ․, սակայն գույքը, որը դատարանը համարում է ապօրինի, ձեռք է բերվել հիմնականում 90-ականներին և ակնհայտ է, որ այստեղ որևէ պատճառահետևանքային կապ չկա: 

«Եթե հետագայում հայցից հրաժարում տեղի չունենա և եթե արագացված դատավարություն տեղի չունենա, ապա նախ մենք կքննարկենք առանձին միջնորդությամբ այցի ապահովումը վերացնելու համար դատարանին դիմելու հարցը և եթե դա էլ չբավարարի, ապա հետագայում ոչ իրավաչափ հայցի ապահովմամբ պատճառված վնասները կարող են պահանջվել պետությունից»,– ասաց նա: