Ձեր նպատակն է վնաս պատճառել իմ մասնագիտական համբավին. Դավիթ Հարությունյանը՝ դատախազին

«Ձեր նպատակն է վնաս հացնել իմ մասնագիտական համբավին»,- Հակակոռուպցիոն դատարանում դատավոր Ռուդոլֆ Ավագյանի նախագահությամբ ընթացող նիստում հայտարարեց արդարադատության նախկին նախարար Դավիթ Հարությունյանը՝ դիմելով հանրային մեղադրողին։

Պատասխանող կողմը դատախազության նեկայացուցչին մի քանի հարց ուղղեց՝ պարզելու թե ինչո՞ւ է հանրային մեղադրողը իր կղմից գրված դիմումը ներկայացրել որպես դիրքորոշում։

Նա մի հատված ընթերցեց դիմումից ու մեկնաբանեց.

«Դիմումում Դավիթ Հարությունյանը պնդում է, որ դատախազությունը կատարի հարցումներ համապատասխան պետական մարմիններից և ստանա որոշակի տեղեկատվություն։ Միաժամանակ Դավիթ Հարությունյանը նշում է, որ իր կողմից իրականացրած ջանքերի արդյունքում պետական մարմիններից ստացած տեղեկատվությունն ամբողջական չէ, և մեջբերում եմ բառացի, կտեսնեք, որ ես նարնջագույնով նշել եմ այդ հատվածը, որտեղ ասված է. «որին մանրամասն կանդրադառնամ դիրքորոշման մեջ»։ Հիմա հայերենի քերականական կանոնների համաձայն, օգտագործված է ապառնի եղանակը։ Հիմա հարցս հետևյալն է, այս դիմումից կարելի՞ է ենթադրել, որ Դավիթ Հարությունյանը պատրաստում է  դիրքորոշում»։

«Այո»,-արձագանքեց հանրային մեղադրողը։

«Այսինքն, սա դիմում է, ոչ թե դիրքորոշում։ Չնայած այն բանին, որ սա դիմում է, ոչ թե դիրքորոշում, իրավասու մարմինը հայցադիմումը ներկայացնելիս ներածության մեջ նշում է, որ Դավիթ Հարությունյանը 19.07.2024թ. ներկայացրել է դիրքորոշում։ Ես ուզում եմ հասկանալ, ի՞նչ իրավունք ուներ իրավասու մարմինը ակնհայտ «դիրքորոշում» բառ չպարունակող փաստաթուղթը, որը վերնագրված է «Դիմում», որը խնդրանք է, որ պահանջվեն փաստաթղթեր, դիմում, որտեղ նշվում է, որ Դավիթ Հարությունյանն ապագայում պատրաստվում է ներիկայացնել դիրքորոշում, ոչ թե հրաժարվում է, ներկայացնի որպես դիրքորոշում»,-ասաց նախկին նախարարը։

Հանրային մեղադրողն ասաց՝ դա ևս դիրքորոշում է, ու պարտադիր չէ, որ փաստաթուղթը «Դիրքորոշում» վերտառությունն ունենա, որ համարվի դիրքորոշում։

«Ստացվում է, որ մեկամսայա ժամկետում դիրքորոշում ներկայացնելու իմ իրավունքը, որ ես ունեմ որպես պատասխանող, որը ես դեռ իրացնում եմ, դուք որոշում եք, որ ես իմ իրավունք արդեն իրացրել եմ և կարիք չկա սպասելու այն դեպքում, որ սևով սպիտակի վրա գրված է՝ ես պատրաստվում եմ ներկայացնել դիրքորոշում, և դեռ ունեմ 7 օր դրա համար»,-ընդգծեց Հարությունյանը։

Նա նաև հետաքրքրվեց, եթե ժամկետը դեռ չի լրացել, ի՞նչն է դրդել դատախազությանը՝ չսպսել մինչև վերջնաժակետը և ներկայացնել դիմումը որպես դիրքորոշում։ Նա նաև հետաքրքրվեց, օրենքի ո՞ր կետի հիման վրա դատախազությունն իրավունք ունի դիմումը ներկայացնել որպես դիրքորոշում։

«Իմ նպատակն է ցույց տալ ձեր դիտավորությունն ինձ վնաս հասցնելու հարցում։ Ձեր նպատակն է եղել ստեղծել պատրանք, հետևել ձևական կանոնների, բայց ես տարբեր հանգամանքների վկայակոչելով՝ ուզում եմ ցույց տալ, որ ձեր նպատակն է եղել բերել հայցադիմում, չստանալ իմ դիրքորոշումը, անել հրապարակային հայտարարություն, որպեսզի վնաս պատաճառեք իմ մասնագիտական համբավին։ Ես աշխատում եմ միջազգային մասնավոր ոլորտում, ստիպված էի իմ հաճախորդներին տեղեկացնել, որ մեղադրվում են ապօրինի ծագում ունեցող գույքի գործով»,-ընդգծեց Դավիթ Հարությունյանը։

Հիշեցնենք, որ դատախազությունն անցած տարվա հոկտեմբերի 8-ին հաղորդագրություն է տարածում՝ նշելով, որ հակակոռուպցիոն դատարանը 2024 թվականի սեպտեմբերի 30-ին վարույթ է ընդունել Գլխավոր դատախազության՝ ապօրինի ծագում ունեցող գույքի բռնագանձման վերաբերյալ հերթական հայցադիմումը:

 Գլխավոր դատախազության ապօրինի ծագում ունեցող գույքի բռնագանձման գործերով վարչությունը պահանջ է ներկայացրել դատարանին՝ ՀՀ արդարադատության նախկին նախարար Դավիթ Հարությունյանից և նրան փոխկապակցված անձանցից հօգուտ Հայաստանի Հանրապետության  բռնագանձել 12 անշարժ գույք, 3 շարժական գույք, 723 միլիոն դրամ: