Վերջին 5 տարիների ընթացքում մենք ունենք բանակից առողջական խնդիրներով ազատված ավելի քան 43 հազար քաղաքացի. Հայկ Սարգսյան

Իրավունք 13 Հունիս, 2025 12:34

«Վերջին 5 տարիների ընթացքում մենք ունենք բանակից առողջական խնդիրների պատճառով ազատված ավելի քան 43 հազար քաղաքացիներ, մենք նպատակ չունենք նրանց դատապարտելու ազատազրկման, այլ նրանց մի մասը եթե կլինի տեղեկատվություն և կտան կրկնակի փորձաքննություն և կտեսնենք, որ նրանք չունեն առողջական խնդիրներ, նրանք եթե կզորակոչվեն պարտադիր զինվորական ծառայության չեն դատապարտվի»,-ԱԺ Պաշտպանության և անվտանգության հարցերով մշտական հանձնաժողովի նիստում ասաց ԱԺ ՔՊ-ական պատգամավոր Հայկ Սարգսյանը՝ ներկայացնելով իր հեղինակած օրենքի նախագիծը։

Նախագծով առաջարկվում է արական սեռի քաղաքացիներին ՀՀ քաղաքացիությունից զերկելու համար պետական տուրքը սահմանել 15 մլն դրամ։ Մյուս փոփոխությամբ Զորակոչի սահմանային տարիքը 27-ից մինչև 32 տարին։ Նախագծով սահմանվում է 25 մլն դրամի դիմաց ծառայել 1 ամիս և 18 մլն դրամի դիմաց 4 ամիս։

Սարգսյանը հայտնեց, որ նախագծով նաև քրեականացվելու է փորձաքննությունից հրաժարվելը և քաղաքացիներին կհրավիրեն կրկնակի փորձաքննության և կսահմանեն 1-3 տարի պատիժ և կպարզեն, թե իրականում վատառողջ են, թե ոչ։

ԱԺ «Հայաստան» խմբակցության պատգամավոր Գեղամ Մանուկյանն ասաց, թե Սարգսյանին լսող քաղաքացին այնքան սիրուն թվեր լսեց, որոնք նախագծում չկան։

«Անարդարությունը վերացնում են, այլ ոչ թե անարդարության առկայությունն օրինականացնում»,-ասաց Մանուկյանը։

Հայկ Սարգսյանը հայտարարեց, թե այս պահին էլ հայաստանում անարդարություն է և շարունակեց, ասելով. «Մենք պատգամավոր ունենք, որի զավակը իր դասարանում միակ ՀՀ քաղաքացի է և նա պետք է զորակոչվի բանակ, ունենք նաև երբ պատգամավորի որդին դասարանում մեկ այլ դասնկերոջ հետ է գնալու բանակ,մյուսները կամ ՀՀ քաղաքացի չեն, կամ այլ ճանապարհներով արդեն բանակից ազատվելու հարցը լուծել են»։

Գեղամ Մանուկյանն առաջարկեց նիստին ներկա արական սեռի ներկայացուցիչների շրջանում հարցում անցկացնեն, թե ովքեր են ծառայել և ովքեր են ազատվել բանակից և ինչ պատճառներով։

Հանձնաժողովի նախագահ Անդրանիկ Քոչարյանը չարձագանքեց առաջարկին։