Ֆրանսահայերը կսատարեն Հոլանդին

Ֆրանսիայի նախագահական ընտրություններում հայամետ Ֆրանսուա Հոլանդի հաղթանակի հանդեպ լավատեսական տրամադրվածություն կա Ֆրանսիայում։ Համենայն դեպս այդ են վկայում երկրով մեկ անցկացվող հարցախույզերի արդյունքները։

Ֆրանսահայությունը ևս աջակցում է սոցիալիստ թեկնածուին, ով դեռևս նախքան իր թեկնածությունն առաջադրելն էր խոստացել պայքարել Հայոց Ցեղասպանության փաստի ժխտումը քրեորեն պատժող օրինագիծը Սենատի օրակարգ մտցնելու համար։ Ֆրանսահայերը հույս են հայտնում, որ Հոլանդն ընտրվելու դեպքում չի մոռանա իր տված խոստումները։ Փարիզի Հայ Դատի գրասենյակի տնօրեն Հրաչ Վարժապետյանն ասել է, թե իբրև սոցիալիստական կուսակցության ղեկավար՝ անցած տասը տարիների ընթացքում Հոլանդը կատարել է Ֆրանսիայի հայ համայնքին տրված իր բոլոր երեք խոստումները՝ արտահայտել է իր հստակ դիրքորոշումը Ցեղասպանության հարցի վերաբերյալ, հայ-թուրքական սահմանն առանց նախապայմանների բացելու հարցում իր զորակցությունն էր հայտնել հայկական կողմին, ինչպես նաև դրսևորել է հստակ մոտեցում Ֆրանսիայում թուրքական հակահայ քարոզչության դեմ։

Վերլուծաբանները հայտնում են, թե առաջիկա ամիսներին սպասվում է թեժ ընտրապայքար, իսկ Սարկոզիի դեմ Հոլանդի առավելության երաշխիքներից մեկը համարում են Սարկոզիի՝ վերջին շրջանում խիստ նվազած վարկանիշը։ վերլուծաբանները նշում են նաև, թե Հոլանդը վայելում է նաև հանրապետականներից շատերի հարգանքն ու համակրանքը շնորհիվ իր մարդկային հատկանիշների։

Հոլանդի հակառակորդներն իրենց հերթին նշում են նրա՝ նախագահի պաշտոնը վարելու համար բավարար ծանրակշիռ քաղաքական անցյալ չունենալը, քանի որ Հոլանդն անգամ նախարարական պաշտոններ չի զբաղեցրել։

Հիշեցնենք, որ Ֆրանսիայի Սոցիալիստական կուսակցությունն օրերս որոշեց, որ նախագահական ընտրություններում իր թեկնածուն հենց Հոլանդն է լինելու։