Ինչ արդյունք կարող է ունենալ Բուդապեշտում Պուտին-Թրամփ հանդիպումը․ El Pais

Ռուսաստանի նախագահ Վլադիմիր Պուտինը չի ընդունի իր ամերիկացի գործընկեր Դոնալդ Թրամփի՝ Ուկրաինայի վերաբերյալ պայմանները Բուդապեշտի հանդիպման ժամանակ։ Այս մասին հաղորդում է իսպանական El Pais թերթը։

Հեղինակները գրում են, որ Թրամփը կարող է առաջարկել շփման գծի երկայնքով ռազմական գործողությունների սառեցում Բուդապեշտի հանդիպման ժամանակ։ Սակայն ռուսական կողմը բազմիցս հայտարարել է, որ նման սցենարը անընդունելի է, և չկա որևէ ցուցում, որ ներկայիս դիրքորոշումը կփոխվի։

Հրապարակումը ընդգծում է, որ այս իրավիճակում Թրամփը շտապ պետք է գտնի նոր եղանակներ՝ պահպանելու իր խաղաղապահ կերպարը, որը ձևավորվել է Գազայի հակամարտության հաջող կարգավորումից հետո։ Հենց այդ պատճառով էլ նա, հնարավոր է, Ուկրաինայի նախագահ Վոլոդիմիր Զելենսկիին հրթիռների մատակարարում խոստանալուց անցել է դրանցից հրաժարվելուն։