Հայաստանն իրեն համարում է ՀԱՊԿ անդամ, բայց այս փուլում ձեռնպահ է մնում հանդիպումներին մասնակցելուց․ Պուտին

Մենք գիտենք ՀԱՊԿ-ի վերաբերյալ Հայաստանի դիրքորոշումը, նրանք իրենց համարում են ՀԱՊԿ անդամ, բայց այս փուլում ձեռնպահ են մնում հանդիպումներին մասնակցելուց, Բիշքեկում ՀԱՊԿ գագաթնաժողովից հետո մամուլի ասուլիսի ժամանակ հայտարարել է Ռուսաստանի նախագահ Վլադիմիր Պուտինը։

«ՀԱՊԿ աշխատանքներին մասնակցելու վերաբերյալ Հայաստանի դիրքորոշումը նրա ընտրությունն է, կազմակերպության անդամ երկրները դրան հարգանքով են վերաբերվում»,- հայտարարել է Ռուսաստանի նախագահը։ 

Նա նշել է, որ Հայաստանն աջակցում է ՀԱՊԿ-ում կայացված բոլոր որոշումներին․

«Դա այն է, ինչ մեզ ասում են մեր հայ գործընկերները։ Նրանք ասում են, որ մենք աջակցում ենք ՀԱՊԿ-ում կայացված բոլոր որոշումներին, մենք մեզ համարում ենք ՀԱՊԿ անդամ, բայց այս փուլում մենք ձեռնպահ ենք մնում կազմակերպության նիստերին մասնակցելուց։ Դե, դա նրանց ընտրությունն է, այնպես որ, եթե նրանք հնարավոր են համարում առայժմ այսպես աշխատել, ապա մենք համաձայն ենք, քանի որ նրանք կազմակերպության անդամ են, մենք կապի մեջ ենք նրանց հետ», - լրագրողներին ասել է Պուտինը։

Միևնույն ժամանակ, Պուտինը հայտարարել է, որ ՀԱՊԿ-ն ոչ մեկի համար սպառնալիք չի ներկայացնում, բայց պետք է պատրաստ լինի հետ մղել ցանկացած ագրեսիա: 

«Մենք ոչ մեկին չենք սպառնում, բայց պետք է պատրաստ լինենք հետ մղել ցանկացած տիպի ագրեսիվ գործողություն մեր երկրների դեմ», - ռուս ղեկավարի խոսքերն է մեջբերել «Վեդոմոստին»։

Նա նաև նշել է, որ Ռուսաստանը կաշխատի իր դաշնակիցների հետ՝ ՀԱՊԿ-ի ռազմական ներուժը ամրապնդելու համար։