Պատժում են մեզ մեր քաղաքական հայացքների համար, սա խափանման միջոց չէր, սա պատժի ձև էր. Լիդյա Մանթաշյան

Լիդյա Մանթաշյանը, որի կալանքը այսօր՝ նոյեմբերի 27-ին, դատարանը փոխեց վարչական հսկողությամբ և 2,5 մլն դրամ գրավով, լրագրողների հետ զրույցում հայտարարեց, որ իր նկատմամբ կիրառված կալանքը քաղաքական պատիժ էր։ 

«Ես անկեղծ շատ հուզված եմ, որ մեր արժանապատիվ ժողովուրդն ընդվզեց այդ ամեն ինչի դեմ։ Այնքան ակնհայտ է, որ այստեղ ահաբեկչություն չկա, այնքան ակնհայտ է, որ ապօրինի մեզ պատժի են ենթարկում։ Սա խափանման միջոց չէր, սա պատժի ձև էր։ Ապօրինի պատժում են մեզ մեր քաղաքական հայացքների համար»,– նշեց նա՝ ընդգծելով, որ անգամ քննիչը գործի մեջ նշել էր իր «գաղափարական թշնամանքը» իշխանությունների նկատմամբ։

«Հետո հասկացան, որ իրենց դեմ է աշխատում դա, սկսեցին այդ ձևակերպումը չօգտագործել, բայց քրեական գործի մեջ գրված է, որ ես գաղափարական թշնամանք ունեմ այս իշխանությունների հետ», ասաց Լիդյան։

Լիդյա Մանթաշյանը նշեց, որ խցում երեք հոգով են եղել, ՔԿՀ–ի հետ կապված որեւէ խնդիր չի ունեցել, պահման պայմանները լավն էին. «Ոնց որ լինի հիվանդասենյակ, ուղղակի դուռը փակ։ Օրվա տարբեր ժամերի որոշակի գործողություններ կան, որ կատարվում են, կլինի ստուգում, կլինի խուզարկություն, կամ աղբն են հանում, գնում ենք մարզանքի։ Շատ-շատ գոհ եմ այն մարդկանցից, ում հետ, որ կալանքի մեջ եմ եղել։ Շատ լավ մարդիկ էին և կարծում եմ, որ այդ մարդկանց հետ կապը շարունակելու եմ, որովհետև բախտակից ընկերներ ենք, նույն կալանավայրում հինգ ամիս ապրել ենք միասին»։

Մանթաշյանը նաև հայտարարեց, որ Հայաստանը պետք է «ազատագրվի», և «Սրբազան պայքարը» շարունակվելու է։