79-ամյա բրիտանացի միլիոնատերը երիտասարդ հարսնացու է փնտրում

79-ամյա բրիտանացի արիստոկրատ և միլիոնատեր Բենջամին Սլեյդը հայտարարել է ամուսնանալու իր մտադրության մասին: Նա անցյալում բազմիցս փորձել է հարսնացու գտնել, սակայն նրա որոնումները միշտ անհաջողությամբ են ավարտվել, հաղորդում է The Times-ը։

Սլեյդը հրապարակել է իր հարսնացուի համար պահանջների երկար ցանկ: Նա պետք է լինի իրենից առնվազն 20 տարով փոքր, ունենա որսորդական հրացանի իրավունք, վարորդական իրավունք և ընտանեկան գերբ: Ուղղաթիռի օդաչու լինելը, իրավաբանական և հաշվապահական գիտելիքները, նրա խոսքով, կլինեն մեծ առավելություն:

Սլեյդի խոսքով՝ հարսանիքից հետո կինը իրեն կպարգևի երկու ժառանգ և կկառավարի իր կալվածքը, երկու ամրոցը ու խոտհարքը։

«Թեկնածուն տարեկան կստանա 50,000 ֆունտ ստեռլինգ՝ գումարած բոնուս։ Սա ներառում է մեքենա, տուն, սնունդ, ծախսերի և արձակուրդի համար գումար։ Guardian-ի բաժանորդներին, «կարիճներին», թմրամոլներին, ալկոհոլիկներին, շոտլանդուհիներին, 168 սմ-ից ցածր հասակ ունեցող կանանց, «Ի» տառով սկսվող երկրների կանանց, այն երկրների կանանց, որոնց դրոշի վրա կա կանաչ գույն կամ որտեղ ձմռանը վերարկուներ չեն կրում, խորհուրդ է տրվում չդիմել։ Ես դեմ չեմ կանադացիներին, ամերիկացիներին, գերմանացիներին կամ Հյուսիսային Եվրոպայի կանանց՝ այսպես ասած՝ նմանատիպ ծագում ունեցող մարդկանց։ Բայց էսկիմոսի հետ ամուսնանալը իմը չէ»,– ասել է նա։

Սա առաջին կամ նույնիսկ երկրորդ անգամը չէ, որ Սլեյդը փորձում է հարսնացու գտնել և երեխաներ ունենալ։ 2017 թվականին Սլեյդը բաժանվել է իր կնոջից, որը, չնայած 21 տարվա տարիքային տարբերությանը, իրեն թվում էր չափազանց ծեր։ Նույն թվականին նա հայտարարություն տեղադրեց՝ փնտրելով «լավ կին», որը պատրաստ է կրել իր երեխային։

2020 թվականին իր աշխատակիցների օգնությամբ նա գրանցվեց ծանոթությունների հավելվածում և փորձեց այնտեղ կին գտնել։ Իր էջը ստեղծելիս արիստոկրատը ստել էր, թե 56 տարեկան է և արգելել էր 40 տարեկանից բարձր կանանց ծանոթանալ իր հետ։