Կրեմլը հայտարարել է, որ չի ցանկանում Ուկրաինայի շուրջ բանակցել հրապարակային ձևաչափով

Ռուսաստանը չի պատրաստվում քննարկել Ուկրաինայի շուրջ բանակցությունների պարամետրերը հրապարակային ձևաչափով։ Այս մասին հայտնել է Ռուսաստանի նախագահի մամուլի քարտուղար Դմիտրի Պեսկովը, փոխանցում է ТАСС-ը։ Նրա խոսքով՝ Մոսկվան չի ցանկանում «նախօրոք հայտարարություններ անել» և նման զգայուն թեմաները քննարկել «հանրային մեգաֆոնի միջոցով»։

Ավելի վաղ Պեսկովը հաստատել էր, որ ԱՄՆ-ն փոխանցել է Մոսկվային խաղաղության պլանի որոշ տարրեր, որոնք ձևավորվել են Ժնևում՝ ամերիկյան և ուկրաինական պատվիրակությունների բանակցությունների ընթացքում։ Դրանք այժմ գտնվում են ռուսական կողմի ուսումնասիրության փուլում։

Բացի այդ, ինչպես ավելի վաղ հայտարարել էր Ռուսաստանի նախագահը՝ Վլադիմիր Պուտին, ԱՄՆ պատվիրակությունը նախատեսում է այցելել Մոսկվա հաջորդ շաբաթ՝ Ուկրաինայի խաղաղ կարգավորման նախաձեռնության շուրջ քննարկումները շարունակելու համար։ Նրա խոսքով՝ ամերիկյան կողմին այդ հանդիպմանը կներկայացնի պատվիրակ, որի կազմը կորոշի ԱՄՆ նախագահը՝ Դոնալդ Թրամփը։