Օրբանը Պուտինին առաջարկել է օգտագործել Հունգարիան Ուկրաինայի շուրջ բանակցությունների հարթակ

Հունգարիայի վարչապետը՝ Վիկտոր Օրբանը, Կրեմլում կայացած հանդիպման ժամանակ առաջարկել է Ռուսաստանի նախագահին՝ Վլադիմիր Պուտինին, օգտագործել Հունգարիան որպես բանակցային հարթակ Ուկրաինայի հակամարտության կարգավորման համար։ Ինչպես հայտնում է ТАСС-ը, Օրբանը նշել է, որ Ուկրաինան Հունգարիայի անմիջական հարևանն է, և Բուդապեշտը լիովին զգում է պատերազմի հետևանքները։

Վարչապետը ընդգծել է, որ Հունգարիան շահագրգռված է հնարավորինս արագ խաղաղություն հաստատելու հարցում և հույս ունի, որ վերջին շրջանում ներկայացված խաղաղ նախաձեռնությունները կարող են այդ արդյունքին բերել։ Նրա խոսքով՝ իր հանդիպումը Պուտինի հետ հնարավորություն է տալիս վերահաստատել, որ Բուդապեշտը պատրաստ է ապահովել բանակցությունների հարթակ և նպաստել խաղաղ գործընթացի առաջխաղացմանը։

Ավելի վաղ հաղորդվել էր, որ հանդիպմանը ռուսական կողմից կմասնակցեն ԱԳ նախարար Սերգեյ Լավրովը, նախագահի օգնական Յուրի Ուշակովը և փոխվարչապետ Ալեքսանդր Նովակը։ Հունգարական պատվիրակության կազմում, Օրբանից բացի, ներկա կլինի նաև երկրի արտգործնախարարը՝ Պետեր Սիյարտո։