Սնուփ Դոգգը նշանակվել է ԱՄՆ հավաքականի պատվավոր մարզիչ Օլիմպիադա-2026-ին

Ամերիկացի հայտնի ռեփեր Սնուփ Դոգգը ստացել է ԱՄՆ հավաքականի պատվավոր մարզչի դերակատարում 2026 թվականի ձմեռային Օլիմպիական խաղերին, որոնք կանցկացվեն Իտալիայի Միլան քաղաքում։ BBC-ի փոխանցմամբ՝ ԱՄՆ ազգային օլիմպիական կոմիտեն նրան նշանակել է կամավորական պաշտոնի, որի շրջանակում նա կզբաղվի մարզիկների մոտիվացիայով և կաջակցի նրանց մրցումներից դուրս։

Նշվում է, որ սա պատմական որոշում է․ մինչ այժմ նման պաշտոն ԱՄՆ օլիմպիական պատվիրակությունում չի եղել։ Սնուփ Դոգգը ընդգծել է, որ օլիմպիական խաղերի իրական հերոսները մարզիկներն են, իսկ իր դերը սահմանափակվելու է ոգեշնչմամբ և կյանքի փորձի փոխանցմամբ։

Ռեփերը նախկինում արդեն աշխատել է Օլիմպիական խաղերի շրջանակում․ 2024 թվականին Փարիզում նա համագործակցել էր NBC հեռուստաալիքի հետ։ Հիշեցնենք, որ ձմեռային Օլիմպիադա-2026-ը կանցկացվի փետրվարի 6-22-ը՝ Միլանում և Կորտինա դ’Ամպեցցոյում։