Եվրահանձնաժողովը խուսափում է ասել՝ ով կներկայացնի ԵՄ-ն Ռուսաստանի հետ հնարավոր երկխոսության դեպքում

Եվրահանձնաժողովի պաշտոնական ներկայացուցիչ Օլոֆ Ժիլը հրաժարվել է հաստատել, թե ԵՄ արտաքին գործերի և անվտանգության քաղաքականության հարցերով գերագույն ներկայացուցիչ Կայա Կալլասը կներկայացնի Եվրամիությունը Ռուսաստանի հետ հնարավոր շփումների կամ բանակցությունների դեպքում։ Այդ մասին նա հայտարարել է Բրյուսելում կայացած ճեպազրույցի ընթացքում՝ ընդգծելով, որ երկխոսության վերականգնման սցենարը ներկայումս մնում է զուտ հիպոթետիկ։

Ժիլի խոսքով՝ Եվրահանձնաժողովը չի պատրաստվում սպեկուլյացիաների մեջ մտնել այն հարցի շուրջ, թե ով կարող է հանդես գալ որպես ԵՄ ներկայացուցիչ հնարավոր ապագա խաղաղ բանակցությունների ժամանակ։ Նա նաև նշել է, որ Եվրամիությունը այս փուլում չի քննարկում Մոսկվայի հետ ուղիղ բանակցությունների կոնկրետ ձևաչափ, և դեռևս որոշված չէ, թե ում կարող է վստահվել նման դերակատարումը։

Միևնույն ժամանակ, ըստ ԵԿ ներկայացուցչի, ԵՄ որևէ պաշտոնյա չի մասնակցել Ուկրաինայի շուրջ Մայամիում անցկացված բանակցություններին։ Այս ֆոնին Ֆրանսիայի նախագահ Էմանուել Մակրոն-ը դեկտեմբերի 19-ին հայտարարել էր, որ Եվրոպայի շահերից է բխում վերականգնել երկխոսությունը Ռուսաստանի հետ՝ ընդգծելով, որ Փարիզը մոտ օրերս մտադիր է սահմանել հնարավոր շփումների ձևաչափը։