Ուկրաինայում սկսել են նախապատրաստվել հնարավոր նախագահական ընտրություններին՝ ռազմական դրության պայմաններում

Ուկրաինայի Գերագույն ռադայում ձևավորվում է աշխատանքային խումբ՝ ռազմական դրության պայմաններում հնարավոր նախագահական ընտրությունների անցկացման հարցը արագ մշակելու համար։ Այդ մասին Telegram-ում հայտնել է իշխող «Սլուգա նարոդա» խմբակցության ղեկավար, նախագահ Վլադիմիր Զելենսկու թիմակից Դավիթ Արախամիան։

Նրա խոսքով՝ քննարկումները կանցկացվեն Գերագույն ռադայի համապատասխան պրոֆիլային հանձնաժողովի, խորհրդարանի բոլոր խմբակցությունների և խմբերի, ինչպես նաև Կենտրոնական ընտրական հանձնաժողովի ներկայացուցիչների մասնակցությամբ։ Գործընթացին նախատեսվում է ներգրավել նաև ընտրական գործընթացներով զբաղվող հասարակական կազմակերպություններ։ Արախամիան նշել է, որ աշխատանքային խմբի առաջին նիստի օրը և ժամը կհայտարարվեն ավելի ուշ։

Ավելի վաղ Ուկրաինայի նախագահ Վլադիմիր Զելենսկին առաջարկել էր նախագահական ընտրությունների անցկացման առցանց ձևաչափի հնարավորությունը՝ հատկապես արտերկրում բնակվող քաղաքացիների համար։ Քննարկումները վկայում են, որ Կիևում դիտարկվում են տարբեր սցենարներ՝ ընտրական գործընթացի կազմակերպման հարցում՝ շարունակվող ռազմական դրության պայմաններում։