Բժիշկները նշել են՝ որքան պետք է տևի առողջությունը բարելավող նվազագույն քայլքը

Նորվեգիայի սպորտային գիտությունների դպրոցի գիտնականները պարզել են, որ անգամ կարճատև՝ 5–10 րոպեանոց ամենօրյա քայլքը կարող է դրական ազդեցություն ունենալ առողջության վրա և նվազեցնել վաղաժամ մահվան ռիսկը։ Հետազոտության արդյունքները և բրիտանացի թերապևտ Բրենդոն Սթաբսի մեկնաբանությունները հրապարակել է The Times-ը։

Գիտնականների տվյալներով՝ օրական ընդամենը հինգ րոպե արագ քայլելը կարող է միջին հաշվով 10 տոկոսով նվազեցնել մինչև 75 տարեկանը վաղաժամ մահվան վտանգը, իսկ 10 րոպեանոց քայլքը՝ մինչև 15 տոկոսով։ Օգտակար է համարվում ցանկացած «փոքր, բայց իրատեսական» ֆիզիկական ակտիվություն, որը բարձրացնում է սրտի զարկերի և շնչառության հաճախականությունը՝ արագ քայլք, հեծանիվ վարել, ջրային աերոբիկա, պար, ռոլիկներ կամ թենիս։

Մասնագետները նշում են, որ ամենաքիչ ակտիվ մարդկանց մոտ արդյունքը ավելի համեստ է․ հինգ րոպեանոց քայլքը կարող է նվազեցնել առողջական խնդիրների ռիսկը մոտ 6 տոկոսով։ Եթե մարդը չի կարող դուրս գալ զբոսանքի, նույնիսկ տնային գործերով շարժվելը կարող է բարելավել վիճակը։ Բրենդոն Սթաբսի խոսքով՝ այս հետազոտությունը հույս է տալիս հատկապես նրանց, ովքեր քիչ են մարզվում, քանի որ անգամ փոքր ամենօրյա փոփոխությունները կարող են զգալի ազդեցություն ունենալ առողջության վրա։ Ուսումնասիրության շրջանակում վերլուծվել են Մեծ Բրիտանիայից, Նորվեգիայից, ԱՄՆ-ից և Շվեդիայից շուրջ 135 հազար մարդու տվյալներ, որոնք հավաքվել են ութ տարվա ընթացքում։