Կյանքը ցույց է տալիս՝ խաղաղությունը ամրացնելու համար պետք է որպես տարածք հետաքրքրություն ներկայացնես. Խաչատուրյան

Շվեյցարիայի Համադաշնություն աշխատանքային այցի ընթացքում Հանրապետության նախագահ Վահագն Խաչատուրյանն այցելել է Ժնևի Սուրբ Հակոբ եկեղեցի։ Հանրապետության նախագահին դիմավորել և ողջունել է Շվեյցարիայի թեմի առաջնորդական տեղապահ Տեր Գուսան Ծայրագույն Վարդապետ Ալջանյանը։

Նախագահը շրջայց է կատարել եկեղեցում, զրուցել Ժնևի հայ համայնքի ներկայացուցիչների հետ և հակիրճ մանրամասներ ներկայացրել Հայաստանում և տարածաշրջանում առկա իրավիճակի և զարգացումների վերաբերյալ։ 

«Մենք այսօր՝ որպես պետություն, բավականին հետաքրքիր ժամանակաշրջանում ենք։ Երկու տարի առաջ մենք բոլորս անհանգստանում էինք, որ անվտանգության ճգնաժամ կար։ Հիմա իրավիճակը փոխվել է։ Մենք հիմա ավելի շատ մոռացել ենք, որ սահմանին կրակոցներ կան, մոռանում ենք, որ սահմանին վտանգներ կան։ Մենք բոլորս ոգևորված ենք «Թրիփփ»–ով, Մեղրիի ճանապարհի ապագայով ենք զբաղված։ Հայաստանը հնարավորություն ունի օգտագործելու իր այդ պոտենցիալը։ Կյանքը ցույց է տալիս, որ խաղաղության լավագույն երաշխիքը հարեւանների հետ խաղաղությամբ ապրելն է եւ բարիդրացիական հարաբերություններ ունենալը։ Կյանքը ցույց է տալիս, որ խաղաղությունը ամրացնելու համար պետք է՝ որպես երկիր, որպես տարածք հետաքրքրություն ներկայացնես»,– ասել է Խաչատուրյանը։